E nosu dringhili cun is bancas : su TARGET2.

TARGET ateru non est che s'acronimu de Trans-European Automated Real-time Gross settlement Express Transfer system (sistema otomaticu deretu europeu de pagamentas a brutu) e TARGET2 est sa secunda genia de TARGET, incingiada dae sa UE in su 2007 (su sistema TARGET s'agatat invecias dae su 1999, ca est intrau in pari cun s'€). 

A bolliri o a marolla, chistionendi de sa crisi de s'Euro, custa ferramenta tocat a dda ponniri in contu.

E duncas, ita est custu TARGET2 e po ita importat a ndi chistionai?

Che sempiri, in antis de cumprendiri sa chistioni, tocat a nci stesiai a largu e a ndi torrai a acostai a bellu a bellu e custa borta tocat a incarrerai circhendi de cumprendiri ita siat unu settlement system (sistema de pagamentas).

Pensaus a ita sutzedit candu cumandaus a sa banca nostra de moviri dinari a un'atera banca (ca depeus pagai a calincunu) liendindi su dinari dae su contu nostru e ghetendi-nce-ddu a unu ateru contu (in italianu si tzerriat bonifico, in inglesu wire transfer).

Comenti funtzionat a beru sa cosa?
Po non ddi tocai a marolla a onnia banca a tenniri unu contu cosa sua me is ateras bancas (annus fait fiat aici), is sistemas bancarius nd'ant strantaxau su chi si tzerriat settlement system chi serbit a manixai is pagamentas intra-bancarias, prus che totu, cun s'agiudu de is bancas tzentralis.
De custus sistemas de pagamentas nci nd'at de duas genias:  
- sistema de pagamentas a puliu (net settlement system), abi benint scritas deretas (a fidi) intradas e bessidas, ma po aparixai (clearing) paghendi su chi si depit pagai e incasciendi su chi si depit incasciai, si abetat a finiri sa dii; 
- sistema de pagamentas a brutu (gross settlement system), abi su saldu benit aparixau a onnia pagamenta.
Gei fait a si ddu pensai ca su sistema de pagamentas a puliu est prus lestru ma bogat prus arriscu po sa banca chi depit arriciri su dinari, ca, si a sa fini de sa dii, sa banca chi depiat pagai non tenit totu su dinari chi serbit po fai is pagamentas, su depidu cun s'atera abarrat abertu.

Est po cussu chi su prus praxili est su sistema de pagamentas a brutu, abi onnia borta sa banca tzentrali, castiat si in su contu de sa banca chi depit pagai, ddoi apat su dinari chi ddu fait a fai sa pagamenta.

In pagus fueddus, onnia banca est comenti e chi tengiat unu contu abertu in sa banca tzentrali de su stadu suu (in Italia est sa Banca d'Italia) cun unu tanti de dinari (a totus is bancas ddis tocat po lei a poderai allogau unu tanti de dinari in sa banca tzentrali issoru) chi ddu fait a pagai su chi depit a is ateras bancas e abi arricit puru is pagamentas chi is ateras bancas ddi faint. 

Duncas sa banca tzentrali tirat e aciungit su dinari po onnia banca, comenti si ddu cumandant.

De custus sistemas de pagamenta a brutu, comenti fait a ddu pensai, onnia stadu tenit su suu (s'Italia tenit su Bi-Rel, sa Frantza su TBF, sa Germania su RTGSplus e aici sighendi).

Pensaus a calincunu chi depit moviri unu tanti de dinari dae su contu cosa sua (chi tenit abertu in una banca italiana) a unu ateru contu (chi est abertu in una atera banca italiana e totu) po biri comenti funtzionat Bi-Rel :

• sa banca italiana abi est abertu su primu contu (su de chini depit pagai), arricit su cumandu de moviri su dinari e ddu aciungit in su contu chi tenit abertu in sa Banca de Italia;
• sa Banca de Italia arricit su dinari (in su contu de sa primu banca) e ddu movit dae su contu de sa primu banca (sa chi pagat) a su contu de sa secunda banca (sa chi arricit) e duncas dae una parti ndi ddu liat e a un'atera parti nci ddu ghetat, ma sempiri abarrendi me is contus cosa sua;
• sa banca italiana abi est abertu su secundu contu (su de chini depit arriciri) immoi ndi liat su dinari dae su contu suu chi tenit abertu in sa Banca de Italia e nci ddu ghetat (me is contus cosa sua) a su contu suu chi ddu depiat incasciai, po serrai su giru. 

Totus custas cosas, est craru, sutzendint in unu patrefillu.

E aici est sa chistioni stadu po stadu. Ma po totu sa UE comenti funtzionat?

Naraus ca su TARGET2 est una genia de sistema de pagamenta a brutu de is aterus sistemas de pagamenta a brutu po totus is stadus de sa UE.

Pensaus immoi a calincunu chi depit moviri unu tanti dinari dae su contu cosa sua (chi tenit abertu in una banca italiana) a unu ateru contu (chi est abertu in una banca tedesca) po biri comenti funtzionat TARGET2 :

• sa banca italiana abi est abertu su primu contu (su de chini depit pagai), arricit su cumandu de moviri su dinari e ddu aciungit in su contu chi tenit abertu in sa Banca de Italia;
• sa Banca de Italia arricit su dinari (in su contu de sa banca) e cun TARGET2 fait sciri a sa BTzE (Banca Tzentrali Europea) ca depit moviri su dinari a sa banca tedesca;
• sa Banca Tzentrali Europea duncas fait sciri a sa Deutsche Bundesbank (sa banca tzentrali tedesca) ca depit aciungiri cussu tanti de dinari in su contu chi sa banca tedesca ddoi tenit abertu e sa Deutsche Bundesbank ddu fait;
• sa banca tedesca, chi immoi at coberau su dinari in su contu cosa sua in sa Deutsche Bundesbank, ndi ddu liat e nci ddu ghetat (in domu sua) a su contu de su chi ddu depiat incasciai, po serrai su giru.

Nc'at una cosa stramba, si biit? 

Sa BTzE manixat TARGET2 comenti e chi siat unu sistema de pagamenta a puliu (mancari siat a brutu) : non incasciat e non movit dinari me is contus de is bancas tzentralias (ca is bancas tzentralis contus abertus innias non ndi tenint), scriit sceti intradas e bessidas sene aparixai mai e duncas is bancas tzentralis de su stadu chi arricint scriint creditus cunfrontas a cussa, is chi pagant invecias scriint depidus cunfrontas a cussa (depidus chi ddis fait pagai a su 0,75%).

Custu andat beni fintzas a candu su tanti de dinari chi nci bessit dae una banca tzentrali a un'atera est cunformas a su tanti chi ndi ddi imbucat, ma si seus chistionendi-ndi est ca is cosas, a dolu mannu, non funt andendi aici.

E sa cosa chi non iat a depiri spantai, est ca is stadus chi funt a depidu funt is chi funt in crisi (sud Europa), ca su dinari est fuendi-si dae inguni.

Su graficu asuta amostrat ita est sutzediu a is saldus TARGET2 dae gennargiu de su 2007 a cabudanni de su 2013 (onnia linia colorada, comenti si podit biri, est unu stadu diferenti). Mancu nau si bolit ca totu su chi est asuba de 0 est surplus (dinari dae incasciai) e totu su chi est asuta de 0 est deficit (dinari dae torrai). Is tantis funt mesuraus in miliardus de €.

In pagus fueddus, is bancas tzentralis de una pariga de stadus de s'Europa funt imprestendi dinari a vili pretziu a is bancas tzentralis de totus is aterus stadus sene ddis ai domandau nisciuna fiantzia, cosa chi sene TARGET2 non iant a fai e sa cosa est sene frenu, ca sa BTzE est comenti e chi siat castiendi sene si ponniri in mesu.

Sa cosa prus stramba puru est ca sa BTzE scriendi su bilanciu cosa sua, ponit a pari creditus e depidus TARGET2 (e duncas ddi torrant a 0 €) e invecias is bancas tzentralis depint scriri de cantu funt indepidadas cun sa BTzE o cantu ddis depit sa BTzE.

Immoi forsis est prus craru po ita est chi is tedescus funt arrabiosus contras a su chi spendint is aterus stadus.

Po ndi sciri de prus
ECB - TARGET2 - Why payment systems at central banks?
EBC - Key ECB interest rates
Euro Crisis Monitor - Institute of Empirical Economic Research
The ECB’s stealth bailout - Hans-Werner Sinn