Su spread.

Inghitzaus assecurendi-nosi de sciri de ita seus chistionendi. 

Ita est su "spread"? In su mundu de sa finantzia, est unu diferentziali.

E su spread chi intendeus arremonau dintedii (si non onnia dii) ita est?

Est sa diversidadi intra su chi si guadangiat comporendi Bund tedescus o BTP italianus (funt ambaduus billetus de depidu a 10 annus).

E fintzas a innoi sa cosa est crara. 

Labai su graficu asuta. Amostrat cumenti est andau su spread (su chi nosi interessat) me is urtimus duus annus (intra aprili 2011 e aprili 2013).

Castiau aici, a solu, non narat meda, ma si circaus de ddu ligiri agiudendi-nosi cun is cosas chi funt sutzedias in custus duus annus insandus sa cosa bessit toga a beru.

Su guvernu de Berlusconi s'est dimitiu su 12 de Donniasantu de su 2011 (12/11/2011) e su guvernu de Monti est intrau su 16 de Donniasantu de su 2011 (16/11/2011). Sa linia arrubia est posta in sa dii chi at inghitzau a governai Monti.

Si fessat stetiu Berlusconi su problema po is mercaus (nosi naraant onnia dii aici ...) dae candu est intrau Monti, su spread ndi iat a essiri depiu calai luegu e totu, invecias si biit ca a pustis de pagu diis de "pruniu", su spread at sighiu a nci pesai.

Ma a Gennarxu at a inghitzau a ndi calai. In su mentris ita est sutzediu? Monti at fatu su decretu "salva-Italia", ma pagu cosa e totu at bofiu nai. 

Su prus dd'at fatu sa BCE (Banca Centrali Europea) cun una filera de cosas fatas po cumbatiri su spread.

Fintzas a candu su spread at torrau a si incarrerai conca a susu. Po ita? Medas cosas : s'economia spanniola at torrau a inghitzai a tzichirriai, sa BCE non s'est cumprendiu prus si iat a ai sighiu a fai cosa po cumbatiri su spread, is politicus de s'Europa ant inghitzau a si pigai a pari e aici sighendi.

Ma in su mes'e Argiolas su spread at torrau a inghitzai a ndi calai, custa borta deaveras. Po ita?

Su 26 de su Mes'e Argiolas de su 2012 (26/07/2012), sa linia asula in su graficu, Mario Draghi (su governadori de sa BCE) nc'at afungau su spread a solu a solu. Dd'est bastau a nai una pariga de cositeddas chi ant fatu cumprendiri ca sa BCE iat a ai fatu totu su teniat in poderi po fai fiantza a is stadus, si serbiat.

«Within our mandate, the ECB is ready to do whatever it takes to preserve the euro. And believe me, it will be enough.»

chi tradusiu est

«In sa faina cosa sua, sa BCE est pronta a fai totu su chi at a serbiri po poderai s'euro. E ponei-mi menti, dd'at a bastai.»

De totu custu chi aeus biu, cantu at contau su guvernu o sa guvernabilidadi de s'Italia in sa carrera de su spread?

Mitzas abi apu piscau
Spread bund/btp 10 Y - 720 giorni - www.borse.it