Candu is italianus parriant tedescus.

S'Italia tenit unu problema de produtividadi, ddu sciint totus, ma circhendi de cumprendiri su poita, parrit sempiri ca chini est prus produtivu est aici po ita ca est mellus de is aterus.

Inghitzaus a nai ca sa produtividadi si podit mesurai in maneras meda, prus o prus pagu pretzisas, ma sa prus facili est aici : valori aciuntu / totus is chi trabballant .

Labai su graficu asuta. Amostrat comenti est andada sa produtividadi dae su 1990 a su 2011 in Italia e in Germania. Po ddu fai nd'apu liau is numerus de su Labour productivity index del situ OCSE chi fiat fatu ponendi a 100 su 2005 e dd'apu torrau a fai ponendi a 100 su 1990, po comodidadi.

Su chi interessat de is indixis non est tanti su chi ballint in tretu in tretu ma prus che totu, comenti currint in su tempus.

E duncas, sa linia arrubia amostrat sa produtividadi de sa Germania, sa linia asula amostrat sa produtividadi de s'Italia.

Comenti si biit, sa produtividadi de sa Germania est andada sempiri crescendi prus o mancu, si ndi bogaus 2008-2009 (candu est inghitzada sa crisi).

Sa produtividadi de s'Italia invecias est andada a passu diferenti.

In antis de su 1990 su tanti chi cresciat sa produtividadi de s'Italia, fiat prus o mancu su propiu tanti chi cresciat sa produtividadi de sa Germania (non ddoi est in su graficu) si ndi bogaus is crisis e is recessionis chi nci funt stetias e chi s'Italia nci dd'at fata onnia borta a si lassai a palas torrendi-si-ndi a strantaxai.

Castiendi is annus prus acanta, dae su 1990 a su 1995, a pustis de ai imbrunchiau, sa produtividadi italiana est parta incarrerada po torrai a cresciri, ma in su 1995 nd'est calada meda, po circai de si ndi torrai a strantaxai in su 1996, in su 1999 e a pustis non ddoi est torrada prus.

Comenti naraiaus in susu, su chi si narat sempiri est ca is tedescus funt prus produtivus po ita ca funt mellus de is aterus, primu primu de is italianus.

Nc'at unu modellu economicu, arreconnotu de is economistas, chi si tzerriat modellu de Kaldor-Thirlwall, fatu a pitzus de sa lei de Verdoorn chi chistionat de produtividadi e chi axudat a cumprendiri sa cosa.

Sa lei de Verdoorn (Petrus Johannes Verdoorn) narat ca prus crescit su chi si produsit, prus crescit sa produtividadi (si chistionat de unu coeficienti de 0,484). Nudda de prus e nudda de mancu de su chi si sciit a pitzus de is economias de scala.

Su modellu de Kaldor-Thirlwall (Nicholas Kaldor e Anthony Thirlwall) invecias, manixendi sa lei de Verdoorn, arribat a nai ca, si crescit su tanti bendiu a foras (esportatzionis) crescit sa produtividadi e su setori chi bendit a foras ameliorat meda e podit arribbai fintzas a ndi surbiri atera fortza po dda poniri a trabballai cun prus frutu.

Ita nc'intrant custu modellu cun s'Italia?

Su graficu de asuta amostrat cumenti funt cambiadas is esportatzionis in su tempus chi andat dae su 1991 a su 2012 (numerus piscaus de su situ Ameco).

Sa linia asula est cussa po s'Italia, sa linia arrubia est cussa po sa Germania e sa linia groga est una media po s'Europa a 15 stadus.

Non fatzat spantu chi is esportatzionis siant caladas (non parrit berus) propiu in cussus annus chi funt stetius unu sciasciu po sa produtividadi, ma ligendi a s'imbressi, comenti fiaus narendi pagu fait, est sa produtividadi chi nd'est calada candu ndi funt caladas is esportatzioni.

Su modellu de Kaldor-Thirlwall si podit ligiri puru dae sa parti de su tanti de prodotus chi benint domandaus e narat duncas ca si su tanti domandau (totu) ndi calat, ndi calat puru sa produtividadi.

E insandus nci ghetaus unu ogu puru a su tanti domandau (natzionali in antis e totu su domandau a pustis) castiendi duus graficus asuta (totus e duus fatus cun is numerus de su situ Ameco).

Su primu graficu (custu asuta) amostrat comenti est cambiau su tanti domandau (natzionali) in su tempus chi andat dae su 1991 a su 2012.

Che sempiri, sa linia asula est cussa po s'Italia, sa linia arrubia est cussa po sa Germania e sa linia groga est una media po s'Europa a 15 stadus.

Su secundu graficu (custu asuta) amostrat comenti est cambiau su tanti domandau (totu) in su tempus chi andat dae su 1991 a su 2012.

Sa linia asula est cussa po s'Italia, sa linia arrubia est cussa po sa Germania e sa linia groga est una media po s'Europa a 15 stadus.

Immoi tocat a cumprendiri beni su chi narant is graficus, a pustis de ddus ai ligius e po custu, sa crai, comenti e sempiri, est a castiai ita est sutzediu in cussus annus.

Su 5 de gennarxu de su 1990 (05/01/1990) : s'Italia, chi fiat intrada in su SME (Sitema Monetariu Europeu) in su 1979, inghitzat a fai santziai su chi ballit sa Lira in su ±2.5% (iat inghitzau faendi-dda santiziai de ±6%).

Su 17 de capudanni de su 1992 (17/09/1992) s'Italia ndi bessit de su SME e su chi ballit su dinari suu comentzat a santziai in libertadi, perdendi prus o mancu su 20% in unu annu.

Su 24 de donnissantu de su 1996 (24/11/1996) s'Italia torrat a intrai in su SME.

Su 1 de gennarxu de su 1999 (01/01/1999) s'Italia est intrada in s'Euro.

Duncas non est spantosu a arribbai a si torrai una sceda facili facili : onnia borta chi s'Italia at fatu cosas chi ant fatu prus cirdiu su cambiu, s'est arrovinada is esportatzionis e is esportatzionis ant arrovinau sa produtividadi. 

Sa cosa toga est ca custu fait a ddu ligiri puru dae sa parti de sa Germania : candu sa Germania at fatu cirdiu cu cambiu (e duncas non dd'est tocau a fai balliri de prus su dinari suu) nc'at guadangiau in esportatzionis e duncas in produtividadi.

Mitzas abi apu piscau
Datus de s'OCSE
Datus de s'Ameco

Po ndi sciri de prus
Cosa sapete della produttività? - Alberto Bagnai
Bassa domanda e declino italiano - Stefano Perri