Amesturai melas e piras non est cosa de pagu contu.

Su 14 e su 15 de Martzu, a Brussels si funt atobiaus is ominis de su Consillu Europeu, po arrexonai de su chi est sutzedendi e prus che totu de economia.

Su governadori de sa BCE, Mario Draghi, at fatu una presentatzioni po fai cumprendiri a is capus de stadu ita est chi est sutzedendi a s'economia de s'Europa, de chini est sa nexi e ita tocat a fai po circai de arresolviri is cosas.

Primu primu su chi si biit est una cosa chi fait spantai meda (labai is graficus asuta) : po su 2012 mancari s'Italia apat tentu tropu depidu po is arregulas de Maastricht (su secundu graficu), non nci est scasseddada a foras de su raportu deficit/PBN (su primu graficu) invecias s'Olanda (chi est tra is stadus chi "staint beni") af fatu a su imbressi ... forsis forsis custa cosa de su depidu non fiat tanti tanti nodia ...

Ma lassaus stai. Sa cosa prus toga est s'arrexonamentu chi at fatu Draghi!

Po ita est chi nc'at stadus in crisi e aterus no? 

Produtividadi e pagas, narat issu.

Labai is graficus asuta.

Is linias asulas amostrant is stadus in surplus (bendint a is strangius de prus de su chi comporant dae foras) e funt Austria, Belgio, Germania, Lussemburgo e Olanda.

Is linias arrubias funt cussas de is stadus in deficit (bendint a is strangius prus pagu de su chi comporant dae foras) e funt Francia, Grecia, Irlanda, Italia, Portogallo e Spannia.

Su chi at nau Draghi est ca is stadus chi funtzionant de prus funt is chi ant cresciu is pagas cunformas a su chi est crescia sa produtividai.

A su imbressi, is stadus chi non funtzionant funt is chi ant cresciu prus is pagas de cantu est crescia sa produtividadi.

Po dda segai in crutzu is stadus chi funt in crisi est ca funt mandronis : tropu pagaus po su chi produsint.

E difatis labai is graficus asuta (unu po stadu) abi si biit comenti sa Germania sia a beru unu esempiu po totus! Is pagas funt crescias ma cunformas a sa produtividadi. Non est aici po is "stadus arrubius".

Ma castiendi beni sa cosa si scoberrit unu sballiu mannu meda (si sballiu est) : sa produtividadi dd'ant contada in numerus realis (contendi puru s'inflatzioni) ma is pagas no (numerus nominalis, sene contai s'inflatzioni).

Labai is pagas in numerus realis comenti funt in su graficu asuta.

Tant'est nudda sa diversidadi, is pagas in Germania funt caladas, ateru che crescias ...
Cun su graficu giustu, sa Germania, dae su chi dda funt faendi parriri (unu stadu chi fait de modellu a totus is aterus) si iat a essiri amostrada po su chi est : unu stadu chi at fatu de totu po cresciri de prus de is aterus sene arrespetai is arregulas po cresciri cun stabilidadi.

Po cantu custus sballius ddus fait chini non ndi sciit, su dannu non est mannu e fait a perdonai, ma si est su governadori de sa BCE chi amesturat melas e piras, sa chistioni est diferenti meda, po ita ca nosi amostrat cosas chi non funt.

E duncas de duas una. O ddoi at unu sballiu (e mannu meda) o sinunca sa linia chi cunsillat sa BCE est ca is pagas nominalis depint cresciri cunformas a sa produtividadi reali. Onniunu nci pensit beni, non est cosa de brullai.

Mitzas abi apu piscau
Mario Draghi’s Economic Ideology Revealed? - Andrew Watt
Euro area economic situation and the foundations for growth - Mario Draghi
Following Germany’s Lead to Economic Disaster - Fabian Lindner