Depidu, austeridadi, contus chi non torrant e figuras lofias : Reinhart e Rogoff.

In su 2010, duus economistas de Harvard, Carmen Reinhart e Kenneth Rogoff, ant fatu girai unu trabballu issoru (cun unu sciacu manu de numerus) chi naraat una cosa facili facili : nc'at una lacana chi su depidu publicu non nci depit scasseddai, sinunca s'economia crescit prus pagu.

Candu su depidu de unu stadu nci sartat su 90% de su PBN - Prodotu Brutu Natzionali, s'economia nci arrimitit. Aici ant nau issus e custa cosa est stetia pigada aici in su seriu dae medas politicus chi totu cust'airi noba de austeridadi (cun totus is problemas chi nd'at bitiu) est filla puru de cussu trabballu.

Po nai sa beridadi, non totus is economistas nci iant cretiu a beru (antzis...) a custa cosa e in custus annus, medas aterus, crosidadosus de sciri sa beridadi, ant circau de ndi torrai a bogai is arresultaus chi nd'iant bogau Reinhart e Rogoff, partendi dae is propius numerus, sene nci arrennesciri.

Nemus nci arrenesciat a fai torrai su contu.

Fintzas a candu, una pariga de ricercadoris de s'Universidadi de su Massachusetts (Thomas Herndon, Michael Ash e Robert Pollin) chi nimancu issus nci arrennesciant a fai torrai is contus, ant pregontau a Reinhart e Rogoff de ddis amostrai su follu eletronicu chi iant portau issus po su trabballu. Reinhart e Rogoff si ddus ant amostrau e su chi nd'est bessiu a pilu non fait onori a s'economia : is contus fiant sballiaus!

In cussu follu eletronicu ddoi fiant tres genias de sballiu :

- non ant postu totus is datus faendi is contus (teniant 110 annus de datus e nd'at bofiu ponniri sceti 96);

- ant fatu improddus cun sa statistica (ant fatu "scarteddus de datus" po ndi bogai una media ponderada dae cussus);

- ant sballiau fintzas una formula in su follu eletronicu (e custu nd'at bogau in prenu dae s'analisi s'Australia, s'Austria, su Belgiu, su Canada, e sa Danimarca).

Curreggendi custas cosas, ndi bessit su chi totus is aterus economistas iant giai scobertu : calincunu aliongiu chi acapiat su de cresciri prus pagu cun su depidu artu esistit, ma non si sciit cali siat e prus che totu non esistit po immoi nisciuna lacana, sa lacana de su 90% de su depidu cunformas a su PBN non bolit nai nudda.

Nc'at pagu cosa dae nai, sceti ca oindii a sballiai is contus fait sciascius mannus.

Po ndi sciri de prus:
Growth in a Time of Debt - Carmen Reinhart e Kenneth Rogoff
Does High Public Debt Consistently Stifle Economic Growth? A Critique of Reinhart and Rogoff - Thomas Herndon, Michael Ash, Robert Pollin
Researchers Finally Replicated Reinhart-Rogoff, and There Are Serious Problems. - Mike Konczal
The Excel Depression - Paul Krugman