Ita ndi scieus de s'Irlanda?

Sicumenti ca totus abarrant sempiri spantaus dae su PBN (PPC) pro capite (Prodotu Brutu Natzionali cun Paridadi de Poderi de Comporai pro capite, in inglesu GDP at PPP per capita) de s'Irlanda, po cantu est artu (unu de is prus artus de Europa e de su mundu) non est mali a nci ghetai unu ogu a is numerus de sa poberesa e prus che totu (biu ca su PBN (PCC) pro capite est aici artu) non tanti a sa poberesa scrita, ma a sa poberesa intendia.

In Friarxu de ocannu, s'oficiu statisticu issoru, su CSO (Central Statistic Office), at fatu bessiri is arresultaus de su chi issus tzerriant SILC (Survey on Income and Living Conditions) po su 2010/2011, chi non est ateru chi una circa fata cun is famillias irlandesas.
Su chi ndi essit a foras spantat puru de prus de su PBN (PCC) pro capite.
  • Sene s'axudu de su stadu (welfare) prus de sa metadi de s'Irlanda (50,7%) iat a arriscai sa poberesa.
  • Su redditu mesanu chi fait a spendiri (contau tirendi-ndi a su redditu totus is pagamentas chi tocat a fai a marolla) po su 2011 est stetiu de 21.440 € (e duncas su tanti nd'est calau de su 3% cunfrontas a su 2010, candu fiat de 22.138 €).
  • Su tanti de is poberus est cresciu fintzas a su 6,9% in su 2011 (in su 2008 fiat su 4,2%).
  • Sa lacana de sa poberesa po su 2011 est arribbada a 10.889 € (e duncas nd'est calada de su 2% cunfrontas a su 2012, candu fiat de 11.115 €) e tocat a prus o mancu 730.000 personas (16%).
  • Sa distributzioni de su redditu (GINI) est abarrada prus o mancu firma, s'indixi GINI sinnat su 31,6% po su 2011 chi est acanta de sa media Europea.
  • Sa genti studiada tirat prus dinari : su redditu mesanu issoru po su 2011 est de 33,244 €.
  • Giai a unu cuartu de sa genti ddi tocat a si ndi privai de cosas chi funt contadas che cosas normalis (papai petza, comporai unu arregallu, a si callentai sa domu in s'ierru e aici sighendi).
  • Unu cristianu a suba de cincu non si podit permitiri de si cambiai sa mobilia mancari siat posta mali meda.
  • Su 14,2% de sa genti chi est acanta a sa lacana de sa poberesa, tenit unu trabballu (duncas is numerus de cantu genti est sene fai nudda non sempiri axudant a cumprendiri).
Su chi perou spantat de prus est sa percentuali de genti chi bivit in famillias VLWI (very low work intensity) chi funt cussas famillias chi intra totus non arribbant a unu tanti de mesis trabballaus a s'annu.
In Irlanda su 22,8% de sa genti chi tenit prus pagu de 60 annus bivit in famillias contadas che VLWI cunfrontas a una media europea de sa metadi prus o mancu. In inglesu si iat a chistionai de social exclusion.

Po su chi pertocat sa chistioni macroeconomica, su chi s'est "spassiendi" de prus est Krugman («Feel the boom!»), chi onnia pariga de mesis scriit un'articulu in su blog cosa sua (che custu o custu) abi amostrat comenti s'Irlanda chi in medas arremonant che torrada a strantaxai gratzias a s'austeridadi, totu in-d-una chi parrit strantaxendi-si-ndi, nci torrat a atzuvai ... e custu sighit aici dae candu est inghitzada sa crisi.
Sa linia asula in su graficu asuta amostrat comenti siat andendi su PBN (Prodotu Brutu Natzionali) dae su 2008.


Est Krugman e totu chi narat ca s'Irlanda gei si nd'at a torrai a strantaxai una dii o s'atera, ma in su mentris nci funt passendi is annus.


Po ndi sciri de prus
Survey on Income and Living Conditions (SILC) 2011 & revised 2010 results - CSO
9 things we learned about poverty in Ireland this week - Christine Bohan
Work and Poverty in Ireland : An Analysis of the CSO Survey o n Income and Living Conditions 2004 - 2010 - Dorothy Watson, Bertrand Maître, Christopher T. Whelan
The Irish economy
Ireland Recovers, and Recovers, and Recovers - Paul Krugman
The Neverending Irish Success Story - Paul Krugman
Ita ndi scieus de s'Irlanda? Ita ndi scieus de s'Irlanda? Reviewed by Andrea Maccis on 16:58 Rating: 5

Nessun commento:

Powered by Blogger.