Ita ndi scieus de Malta?

Una circa economica fata dae unu frantzesu (Alan Lemagnen) po una banca, amostrat cantu s'economia de Malta assimbillit a s'economia de Cipro e duncas comenti si depat arrexonai a suba de su perigulu chi si potzat tzacai aici comenti s'est tzacada cudd'atera.

Comenti e Cipro, seus chistionendi de un'economia pitica (in su 2012 su PBN-Prodotu Brutu Natzionali suu fiat de 6,8 miliardus de € e duncas su 0,08% de s'area €), aberta meda e chi bivit po su prus de duas cosas : turismu e bancas.
Dae candu Malta est intrada in s'Unioni Europea, at fatu de totu po bessiri unu de is logus off-shore prus mannus de s'area € (est intrada in su 2008) e nci dd'at fata (su graficu asuta amostrat ca cantu a mesura de bancas cunformas a su PBN-Prodotu Brutu Natzionali, est prus pitica sceti de su Lussemburgo), portendi-dda a tenniri unu manniori de su tanti moviu de is bancas chi est su 792% de su PBN-Prodotu Brutu Natzionali.

Comenti nci dd'at fata? Nudda de prus che su chi at fatu Cipro.

Su sistema fiscali est bessiu prus che praxili po is impresas e is ominis e custu at intzidau a is strangius a nci portai meda de su dinari issoru a innias.

Is graficus asuta amostrant comenti dae su 2004 a su 2013 su dinari arriciu (graficu 1a) e imprestau (graficu 1b) a is maltesus (is linias prenas) non siat cambiau giai nudda e totu (su mercau maltesu est pagu cosa e duncas totu cussa licuididadi innias non at tentu spaciu), ma amostrat puru cantu siat cresciu su dinari arriciu dae foras e imprestau a foras (is linias aprefalliadas) .

Su chi nd'arresultat est ca in su 2012, su PBN-Prodotu Brutu Natzionali issoru est stetiu de 6,8 miliardus de € ma su bilanciu de is bancas de 54,2 miliardus de €. 

Duncas cun unu depidu publicu chi est prus o mancu su 70% de su PBN si aessat depia serbiri una calincuna genia de ricapitalizzatzioni po is bancas, nareus 5 miliardus de € (sa metadi de su chi est serbiu a Cipro) su depidu publicu nci iat a saliai a su 135% de su PBN.

Tropu mannus po essiri sarvaus cun unu bail-out duncas e puru tropu mannus po essiri sarvaus cun su ESM (European Stability Mechanism), non iat a essiri cosa spantosa chi in casu aessat serbiu, fessat detzidiu de fai unu bail-in biu ca su 63% de is passividadis (33,7 miliardus de €) est dinari allogau dae is clientis.

Parrit perou chi is cosas chi assimbillant Cipro e Malta spacint innoi po ita ca :

1. sa parti prus manna de su setori bancariu maltesu est fatu dae cambus de bancas strangias capitalizadas beni chi arricint dinari issoru e totu (chi ndi benit dae is stadus meris);
2. is bancas maltesas non funt meda intrallatzadas cun investimentus prenus de arriscu comenti is billetus de depidu de stadus a is orus de s'€uropa (comenti fiat Cipro cun sa Grecia);
3. is bancas maltesas non funt meda intrallatzadas cun s'arriscu chi ndi podit benniri dae is problemas de su mercau de is domus po ita ca s'economia issoru ancora non s'est incorrutzada meda.

Po ndi sciri de prus

Les banques maltaises sont-elles porteuses de risque ? - Alan Lemagnen