Libbrus chi tocat a lìgiri : Anschluss.

Cantu bortas dd'aeus intèndiu ca dae candu nd'ant sciorrocau su muru in su 1989, is tedescus nci dd'ant picigada in pagu tempus a torrai a pòniri in pari is duas Germanias comenti e chi non ddas aessant partzidas mai? Ellus ... a sa moda de s'Italia cun is terras de Mesudii (Mezzogiorno) chi abarrant ancora partzidas prus che dae unu muru, pròpriu dae unu sperefundu de arrichesa e possibilidadis.

Ma, che sèmpiri, totu su chi intendeus, tocat a ddu pòniri in su pratu de sa pesa a puliu (ca a brutu est prus grai) e custa borta puru, torrendi gràtzias a su trabballu mannu fatu dae Vladimiro Giacché cun unu libbru (Anschluss. L'annessione. L'unificazione della Germania e il futuro dell'Europa - Imprimatur, 2013), fait a lestru (funt pagu prus de 300 pàginas) a si ndi scabbùlliri dae totus is fàulas e is mesu-beridadis chi aeus intèndiu ghetadas a pari in custus annus.

Est berus ca dae candu ddas ant torradas a pòniri in pari, is duas Germanias funt ogualis? Fàula! Sa chi fiat prus arrica (Germania Ovest) s'est arricada de prus e invècias sa chi fiat prus pobera (Germania Est) dd'at acabbada peus.

Est berus ca sa Germania chi fiat prus pobera nc'at guadangiau a si pòdiri aprigai a su paracu de su poderi de su dinari de sa Germania prus arrica? Fàula. Nd'ant cassau una sciustura de genti sene trabballu chi dd'est tocau a si ndi andai conca a sa Germania prus arrica.

Est berus ca sa Germania prus pòbera fiat aici pòbera ca si non s'aessat posta in pari cun cussa prus arrica dda iat acabbada fallida? Fàula. Po cantu funt abarraus a solus, mancari non aessant arau a cuatru bois, trabballànt e biviant. Innias. Cosa chi immoi no nci dda faint prus a fai che scedosu.

Ma sa cosa chi nosi iat a dèpiri impensamentai de prus (comenti narat Giacché e totu) est cantu custa stòria assimbillit a su chi funt circhendi de fai a s'Europa, acapiendi a pari (cun su pròpriu dinari) terras diferentis meda (is prus arricas cun is prus pòberas) e manixendi su dinari po donai una impellida conca a seberus chi sa genti no iat a bòllliri si non fessat po s'amarolla.

Si ddu boleis comporai
Anschluss. L'annessione. L'unificazione della Germania e il futuro dell'Europa - Amazon