S'ou, sa pudda e s'arriali de Dani Rodrik.

Dani Rodrik (Institute for Advanced Study) est unu economista turcu, connotu meda in totu su mundu po is trabballus cosa sua a pitzus de comenti is guvernus funt bonus (o prus pagu bonus) a tirai is odriangus de s'economia.

E biu ca su fai de is studiosus iat a dèpiri èssiri a fai luxi (po sa genti) abini ddoi at scuriu, fait a castiai cun spantu (e puru cun unu tantixeddu de pensamentu, si unu si sapit) una de is ideis cosa sua : su Trilemma de Rodrik. 

In pagus fueddus issu nd'at strantaxau unu teorema chi ammostrat ca, in s'economia de su mundu, sa democratzia, sa sovranidadi (natzionali) e sa globalizatzioni, non podint bìviri totus e is tres in pari. Nc'at pagu cosa ita fai, narat issu, fait a ndi sceberai in pari sceti duas de custas cosas (ita si bollat chi siant) e una tocat a marolla a dda lassai stai.

Inghitzaus a nai ita tocat a sciri po nci cumprèndiri calincuna cosa.

Po chi sa globalizatzioni siat cumprida, tocat a ndi tirai totus is dàtzius e is pagamentas chi si acostumant a ghetai a chini bendit e a chini comporat atraessendi is lacanas de is stadus, ca totu su chi strobbat po bèndiri e comporai dae unu logu a s'àteru fait dannu candu s'idei est a stèrriri mesa po fai sètziri totus is stadus de su mundu. E funt is stadus cun sa sovranidadi natzionali issoru chi faint totu custu strobbu.

E insandus?

Sa primu possibilidadi (democratzia + globalizatzioni) est a ndi strantaxai una calincuna arratza de "federalismu mundiali" (global federalism) abini si circat de cuncordai sa democratzia e is mercaus po ddus fai passillai a manu pigada. Mancu nau si bolit, est trabballosu sceti a ddu pensai, ita at a èssiri a ddu fai e su chi est acuntessendi in custus tempus in Europa, si scerat beni.

Sa secunda possibilidadi (sovranidadi + globalizatzioni) est a poderai biatzus is stadus natzionalis ma incorrutzendi-ddus a sa parti de su chi bolint is mercaus, faendi-ddis fai, si serbit, su interessu de su mercau mondiali (e duncas de is allenus), contras a s'interessu de is de domu. Su Gold Standard fiat una manera de circai de fai una cosa chi dd'aessat assimbillada e giai dd'aeus biu comenti dd'at acabbada.

Sa de tres possibilidadis invècias (democratzia + sovranidadi), est a ndi calai unu paghiteddu cun s'afròddiu de sa globalizatzioni funguda, torrendi a scobèrriri s'arti de s'acòdriu, comenti iant pensau de fai is stadus (a pustis de sa secunda gherra mondiali) cun Bretton Woods, faendi a castiadoris a su dinari chi si moviat dae unu stadu a s'àteru, ma fintzas afachendi unu paghiteddu is gennas, chi in antis fiat abertas, a su bèndiri/comporai sene lacana.

Sa figura asuta ammostrat totu su chi aeus nau fintzas a immoi.

Is antigus, a manera issoru, a unu pregountu che custu ddi iant giai torrau sceda: no fait a tèniri s'ou, sa pudda e s'arriali. Po issus fiat craru.  

Seus nosu chi invècias oindii seus ancora chistionendi-ndi ...

Po ndi sciri de prus
The inescapable trilemma of the world economy - Dani Rodrik
The Truth About Sovereignty - Dani Rodrik