Draghi acutzat is arresojas de sa BTzE.

Sa primu giobia de su mesi, su Consillu chi guvernat sa Banca Tzentrali Europea s'atobiat in Frankfurt am Main po scioberai ita fai dae innoxi a su mesi chi intrat, po totu su chi ddis tocat che doveri issoru (prus che totu cosas chi poderint asseliaus is pretzius, ma non sceti).

E custa giobia puru, su 5 de su mesi de Lampadas, si funt atobiaus e che onnia borta dae s'atobiu issoru, nd'est bessida una filera de scioberus chi Mario Draghi (su Presidenti) at nau a is giornalistas, e chi unu paghiteddu spantant, ma aici e totu amostrant beni beni cali siant is timorias prus mannas e conca abi siaus incarrerendi-nosi :

• ant abasciau is interessus MRO (Main Refinancing Operations), chi funt is prestidus chi sa BTzE fait a is ateras bancas cida po cida, portendince-ddus a su 0,15% (fiant a su 0,25%);
• ant abasciau is interessus MLF (Marginal Lending Facility) chi funt is prestidus chi sa BTzE fait a is ateras bancas dii po dii, portendince-ddus a su 0,40% (fiant a su 0,75%);
• ant abasciau is interessus DF (Deposit Facility) chi funt is interessus pagaus dae sa BTzE a pitzus de su dinari chi is ateras bancas poderant po pagu tempus (overnigth) me in sa cascia de sa BTzE, portendince-ddu a -0,1% (duncas is bancas chi ponint su dinari innias nci arrimitint);
• ant ghetau sa grida a is bancas ca nci at a essiri un'atera passada de prestidus LTRO (Long Term Refinancing Operation), custa borta po 4 annus e puntaus (TLTRO, Targeted Long Term Refinancing Operation) conca a s'idei de ddas intzidai a ndi liai unu tanti de dinari (arribbendi fintzas a su 7% de su tanti chi giai tenint imprestau a is privaus) po ddu imprestai a is famillias e a is impresas, paghendi po custu dinari unu tanti de interessu ogualis a su MRO prus unu 0,1%;
• ant scioberau de sighiri a amitiri certas ateras atividadis po fai a fiantza contras a is prestidus nous, a su mancu fintzas a su mesi de Cabudanni de su 2018;
• ant scoviau ca funt sighendi a trabballai po ndi strantaxai (ma non si sciit candu) una genia de QE (Quantitative Easing) po fai innentzionis de dinari comporendi billetus de depidu in su mercau ABS (Asset-Backed Security) chi iant a depiri essiri segurus biu ca funt acapiaus a is atividadis chi ddis faint a fiantza.

Si biit craru craru conca abi tirant : 

• a primu lungiri is arrodas de s'economia cun dinari friscu (po cussu nd'ant calau su pretziu de is interessus);
• circai de non fai acarropai su dinari in logu perunu (po cussu ant portau a suta de 0 is interessus po is bancas chi lassant dinari in sa BTzE, po ddas scramentai de ddu lassai firmu);
• circai de nci tirai su pudesciori de cussa parti de economia chi est firmendi-si cun unu arriu de dinari nou (po cussu ant ghetau sa grida po su TLTRO nou e ant scoviau ca funt pensendi in su seriu a una genia de QE). 

Non si podit nai chi non siant acutzendi totus is arresojas chi ddoi tenint in Francoforte, chi forsis, comenti narant cussus intranniaus a su mali, ant a essiri arresojas chi serbint sceti a pungiri sa deflatzioni, chi po calincunu si scerat giai, mancari issus (is chi guvernant sa BTzE) sigant a nai ca non dd'ant ancora apubada. Po cussu totu su chi faint, narant ca est conca a una lacana de inflatzioni chi s'asselit a su 2% (e immoi seus a tesu meda).

Sa cosa chi sighit a fai a timiri est ca s'atera borta puru, un'arriu de dinari nou dd'at finida po s'acarropai e totu, cun s'economia chi at sighiu a si pudesciri.

Po ndi sciri de prus
Introductory statement to the press conference - Mario Draghi (President of the ECB), 5 June 2014
ECB interest rate decision - as it happened June 5, 2014 - The Telegraph - Camilla Turner
ECB imposes negative interest rate - BBC
Why Negative Rates Won't Work In The Eurozone - Forbes - Frances Coppola