Candu unu arricu circat de ponniri sentidu a is aterus arricus.

De is arrexonamentus chi funt pighendi fogu a pitzus de sa classi mesana ndi iaus giai chistionau po ita ca totus is economistas (e non sceti issus), funt acatendi-si-ndi ca su dd'ai fata bessiri pobera (a sa classi mesana) nci at atzuvau is economias de is stadus "fortis", ma a ligiri ca nc'at puru arricus chi pensant chi siat aici (biu ca issus nci ant guadangiau dae sa cosa) fait spantu a beru.

Henry Blobget (trabballaat in sa Merrill Lynch candu si fiat unfrada sa bulluca dot-com e candu s'est tzacada dd'ant fintzas cundennau) at scritu unu articulu chistionendi de is arrexonamentus chi Nick Hanauer (imprendidori e investidori americanu, intrallatzau cun Amazon e aQauntive po ndi nai duas) at sterriu po Politico Magazine a pitzus de su trumentu abi nosi nci ant stichiu. 

Su spantu prus mannu est ca Nick Hanauer non est scriendi po fai cumprendiri a is poberus, ma po fai cumprendiri a is arriconis che issu e totu cantu siat impensamentau, scioberendi fintzas una manera chi arresigat beni beni : "labai ca funt arribbendi cun is trebutzus".

Su burdellu prus mannu, narat issu in pagus fueddus, est ca sa classi mesana chi fintzas a pagu tempus teniat poderi e arrichesa, me is urtimus 20 o 30 annus est bessida pobera po mori de is pagas chi funt abarradas firmas si non si funt fintzas torradas. 

Ma ita ndi ddi importat a Hanauer?

Sa chistioni est ca sa classi mesana spendit giai totu su chi coberat trabballendi e custu dinari spendiu bessit guadangiu po is atividadis de Hanauer e de is amigus arricus cosa sua.

Hanauer ddu cumprendit beni ca sa sorti cosa sua ndi benit sceti dae su essiri nasciu in su logu giustu in su tempus giustu, unu logu abi sa classi mesana teniat dinari po spendiri e pigaat is cosas produsias o bendias dae is atividadis cosa sua, fintzas a ddu fai bessiri arricu (sa famillia sua at inghitzau faendi e bendendi cabidalis).

Hanauer si dda pigat a coru, prus che totu po bogai a faula una pariga de cosas:

• s'idei de su trickle-down (tradusiu, stiddiai a basciu) est unu machimini;
• non est berus ca funt is arricus chi faint su trabballu.

Ddus castiaus a unus a unus.

S'idei de su trickle-down narat ca onnia borta chi calincuna cosa fait profetu a is arricus, finit ca ndi stiddiat fintzas a basciu e duncas ndi guadangiant puru is poberus. Po bogai a faula custa cosa non serbit nimancu a si stentai meda, bastat a castiai comenti is arricus siant bessius prus arricus e is poberus prus poberus in su mentris, ma Hanauer dd'amostrat mellus puru chistionendi de issu. Tirat a 1000 bortas de prus de unu cristianu cali-si-siat de sa classi mesana, ma non spendit 1000 bortas su tanti de unu de sa classi mesana, su dinari in prus dd'arreguat. Po ita si iat a depiri comporai 1000 pariga de crapitas onnia borta chi andat a butega? O 1000 pariga de cratzonis? E duncas comenti fait custu guadangiu cosa sua a stiddiai fintzas a fai profetu a is chi funt in basciu cunfrontas a issu, si su dinari non ddu torrat a ponniri a curriri?

Sa chistioni de su trabballu invecias est cosa prus nodida, ca totus pensant chi siant is arricus, is imprendidoris chi faint su trabballu, cussu trabballu chi assegurat is pagas a is chi trabballant. 

Ma berus est? Hanauer ddu narat craru : no. 

Issu e is cumpangius suus imprendidoris ndi strantaxant is atividadis, o candu non ddu faint a deretu nd'axudant ateras fintzas imprestendi-ddis dinari, ma candu s'economia non correspondit sa cosa durat pagu meda. Su trabballu ddu fait s'economia sana e s'economia sana s'agatat sceti candu sa genti chi ddoi est a intru (prus che totu is de sa classi mesana) portant dinari in busciaca.

A nai ca "is arricus faint su trabballu" est comenti e nai ca "su semini fait sa mata", narat Hanauer, ma ddu scieus beni ca sa mata dda fait sa terra abi est prantada, is bortas chi dd'acuas, dda fait su soli chi arricit e unu biaxi de ateras cosas. Si nci ghetas unu semini a una terra mala e non ddu acuas mai, ita fait? Si morrit.

Cantu at a durai sa cosa aici fintzas a candu totu custa genti sene fai nudda o chi portat sempiri prus pagu dinari in busciaca at a aferrai is trebutzus? Est custu chi impensamentat a Hanauer, e a manera sua est ghetendi unu erchidu po ndi scidai a is cumpagius suus, mancari parrat chi siant giai totus grais de origas.

Po ndi sciri de prus
The Pitchforks Are Coming… For Us Plutocrats - Nick Hanauer
Sorry, Folks, Rich People Don't Create The Jobs - Henry Blodget