Su Nobel 2016 : cuntratus e acòrdius.



Annus de trumentus po sa macroeconomia, bastat a castiai ita totu est acuntessendi in Europa e me in su mundu e comenti is economistas parit chi no siant bonus a ndi bogai peis, e duncas ocannu puru, su Nobel po s'economia (chi, comenti naraus ònnia borta est su prèmiu po is scièntzias econòmicas chi at postu sa Banca Tzentrali Svedesa po arregordai a Alfred Nobel) dd'at bintu sa microeconomia.

Oliver Hart (in sa fotografia a manu manca) e Bengt Holmström (in sa fotografia a manu dereta), ant bintu a mes'a pari, po su traballu insoru a pitzus de is contratus chi acàpiant a pari meris e serbidoris o sociedadis e clientis.

Hart, professori americanu (nàsciu in Inghilterra) chi traballat me in su Massachusetts Institute of Technology, at bintu po is circas cosa sua a pitzus de is lacanas chi tenint is acòrdius, candu cumbenit a essi meris de una atividadi e a si dda fai a solus o candu cumbenit a pagai a àterus po dda fai (s'arregorta de s'aliga, po narai, po issu cumbenit chi is comunus dda fatzant fai a sociedadis privadas prus che dda fai fai a is òminis cosa insoru) e po comenti, in pagus fueddus, a arrespramiai su dinai o a nci perdi is odriangus de is atividadis, siant cosas chi andant amesturadas beni a pari.

Holmström, professori finlandesu chi traballat me in s'universidadi de Harvard, invècias at bintu po su traballu cosa sua a pitzus de is cuntratus chi arregulant is acòrdius de traballu chi faint is meris cun is serbidoris. Su fueddu sardu "serbidori", narendi sa beridadi, no agiudat meda a cumprendi sa chistioni, casi ca su traballu de Holmström, prus che totu, chistionat de cantu (e comenti) a is sociedadis ddis cumbenit a pagai is grandus dirigentis cunformas a is arresultaus chi nci dda faint a ndi scabulli. Po ita, si sciit, is sociedadis circant genti chi traballit comenti e chi siant is meris de totu (e duncas chi traballint a de dii e a su noti, arrischendi pagu e faendi guadangiai meda), invècias a chini circat unu traballu ddi praxit a arribai a tirai paga bella faendi su prus pagu chi fait.

In pari Hart e Holmström, chi funt puru amigus, ant scritu in su 1986 unu paperi abì amostant comenti po is sociedadis a bortas siat perigulosu a sceberai su tanti de is pagas cunformas a is arresultaus chi is dirigentis nd'ant a scabulli, po ita ca is cuntratus a s'enia o a s'àtera ddus scriint meda prus curtzus de comenti iant a depi essi po intzertai totu su chi podit acuntessi e arriscant de intzidai a is dirigentis a fai cosas chi andant beni po ddis fai cresci sa paga, ma andant mali po sa saludi de s'atividadi.


Po ndi sciri de prus
The Sveriges Riksbank Prize in Economic Sciences in Memory of Alfred Nobel 2016 - nobelprize.org
Oliver Hart and Bengt Holmstrom Win Nobel in Economics for Work on Contracts - Binyamin Appelbaum - New York Times
Su Nobel 2016 : cuntratus e acòrdius. Su Nobel 2016 : cuntratus e acòrdius. Reviewed by Andrea Maccis on 13:13 Rating: 5

Nessun commento:

Powered by Blogger.