Operatzionis de gherra - S'arti de sa gherra (10)

(Figura liada de pixabay)

 
Sun Tzu iat narau:

In pagus fueddus, custa est sa manera po cuncordai is operatzionis militaris

Milla carrus de gherra lestrus, milla carrus cobertus de peddi, centumilla sordaus armaus e sa possibilidadi de s'atragai su papai po prus de milla li
Po is spesas me in patria e me in mesu a sa batalla, po is pagas de is consilleris stràngius, po su chi costant is cosas che sa pasteta e sa laca, de is carrus e de is armaduras, su Stadu at a depi ponni milla soddus de oru a sa dii.
Si ddu podit disponi, insandus s'ant a podi aprontai centumilla sordaus.

Candu ses incaramessau in una batalla
Si ses trighendi a dda binci, is sordaus bessint de mala spètzia e is armas issoru si ingurdant.
Si incortillas citadis afortiadas, arriscas de spaciai is fortzas cosa tua.
Si sa gherra sighit, s'arrichesa de su Stadu acabat ca no ddu fait.
Candu is sordaus bessint de mala spètzia, is armas issoru si ingurdant,
Is fortzas cosa tua e s'arrichesa spàciant,
Insandus is bixinus cosa tua nd'ant a aprofitai a t'ant a assaltillai.
Nimancu unu consilleri sàbiu ti nd'at a podi salvai.

Duncas, si puru apu intèndiu de atzionis drollas arrennèscias po ita ca ddas ant fatas a lestru, no apu mai biu arrennèscia un'operatzioni mancai àbili ma chi fessat cosa longa.
E no nc'at mai stètiu una gherra longa chi apat fatu profetu a una natzioni.

Aici, chini no connoscit beni is perigulus de su imperai is armas,
Aici e totu no podit connosci beni su profetu chi fait a ddas imperai.

A su chi est bonu meda me in s'arti de sa gherra
No ddi fait abisòngiu una segunda leva de sordaus, ni de si fai mandai tres bortas su papai e s'achipàgiu.
S'achipàgiu ddu depit mandai su Stadu, ma su papai tocat a ndi ddu scabulli in terra nemiga.
Aici a is sordaus su papai no ddis at a pecai mai.

Po custu, su generali sàbiu bandat in circa de cosa de papai in mesu a su nemigu.
Ònnia cuarra de cosa de papai de su nemigu ndi ballit binti de is mias.
Ònnia domu de sa palla ndi ballit binti de is mias.

Po bociri a su nemigu tocat a essi arrabiaus.
Po ndi ddi furai sa cosa bastat a sciri ca ti cumbenit.



No serbint a marolla is lìburus de economia po cumprendi s'economia.
A bortas bastat a ligi su chi scriiat prus de duamilla annus a oi sa genti a s'àteru càbudu de su mundu, po si nd'acatai de comenti is cosas andànt, andant e forsis ant a andai sèmpiri.

Sa primu parti dd'agatais innoi.
Sa segunda parti dd'agatais innoi. 
Sa de tres partis dd'agatais innoi.
Sa de cuàturu partis dd'agatais innoi.
Sa de cincu partis dd'agatais innoi. 
Sa de ses partis dd'agatais innoi.
Sa de seti partis dd'agatais innoi.
Sa de otu partis dd'agatais innoi.
Sa de noi partis dd'agatais innoi.