Pokémon GO e su capitalismu de oindii.

 Fotografia tirada de Andrew H. Walker/Getty Images

Seguru ca Pokémon GO dd'eis intèndiu arremonau a su mancu una borta o de sa televisioni o de s'arràdiu o mancai de calincunu (mannu o piticu) chi ndi dd'at scarrigau po giogai. E strambu puru iat a essi su no dd'ai intèndiu ... ndi chistionant totus: a bolla o a marolla est sa moda de custas diis.

Po is chi no dd'ant intèndiu mai (si calincunu s'agatat a beru) est unu giogu po is telefoninus, no est chi siat custu grandu spantu.

Ma insandus, si totus funt chistionendi-ndi, ita importat su sighiri a ndi chistionai?

Est ca, comenti e totus is cosas chi nci dda faint a movi su interessu de unu tanti de genti aici (a chini ndi chistionat, a chini nd'arrexonat, a chini ndi ddu scàrrigat, a chini giogat, a chini si nd'amàchiat, a chi ddu stimat, a chini ddu tìrriat), amostat cosas meda: cosas de sa genti, cosas de su mundu, cosas de custus tempus e prus che totu cosas de s'economia.

Timothy B. Lee (chi scriit po Vox) at circau de arrexonai de custa chistioni custas diis passadas e Tim Worstall (chi scriit po Forbes) dd'at torrau sceda arrexonendi-ndi aici e totu ma a un'àtera manera. Mancu narau si bolit, unu narat una cosa e s'àteru a su imbressi, ma, ligendi su chi ant scritu ambaduus, fait a si trumbullai cantu e cantu sa conca, pensendi-nci.

Po ita ca, unu giogu chi movit totu custa genti e totu custu dinai (parit chi is meris siant guadangendi-nci prus de unu milioni de $ a sa dii), narat Timothy B. Lee, est sa fotografia tirada a su chi no est traballendi beni de su capitalismu de oindii, cunformas a su capitalismu de su sèculu passau.

Si unu si boliat spassiai cun is amigus, 50 annus a oi, ita faiat? Bessiat po andai a cinema, po andai a calincunu logu a papai e a bufai foras de domu, po andai a baddai, totus cosas chi portànt dinai a s'economia de su logu abì biviat e oportunidadis de traballai po is chini fiant sene fai nudda e biviant in cussu logu e totu (faiat a aberri cinemas nous, localis nous e aici sighendi).

Pokémon GO, mancai fatzat a ndi ddu scarrigai a gratis, si boleis, dinai si ndi fait ponni e totu, narat B. Lee, ma custu dinai abì andat? Si ddu partzint is sociedadis meris de su giogu, faendi cresci su tanti de dinai chi currit foras de totus is logus de su mundu, po andai a si acorropai in una pariga de logus sceti (is citadis mannas abì ddoi est s'industria de sa tecnologia de s'arretza) faendi cresci sa diversidadi me in s'arrichesa de is logus s'unu cun s'àteru.

No est una chistioni de Pokémon GO sceti, ma de sa tecnologia de s'arretza.

S'America, sighit a nai B. Lee, industrias acorropadas in una pagus logus nd'at tentu giai, bastat a pensai a is veturas me in Detroit, ma insandus ita est chi fiat diferenti? Ca s'industria mancai fessat acorropada, bogàt cosa de fai puru me in totus is logus abì bendiat su chi produsiat. Pensaus a is veturas chi ndi bessiant totus de Detroit ma faiant traballai me in ònnia bidda po ddas arrangiai. Una cosa aici no fait a dda narai po su software e nimancu po su hardware, is telefoninus po narai, ca medas bortas cumbenit prus a nci ddus scavuai chi no a ddus fai arrangiai, po su chi costant.

E ita fait a nai de su dinai imprestau? Ca po cantu is industrias acorropadas moviant afàrius puru atesu de abì fiant, sa genti chi boliat imprestai dinai po nci guadangiai, agatàt sèmpiri a calincunu chi de dinai ndi boliat po ddu ponni a fai cosa e invècias in custus tempus genti cun ideis po investiri si nd'agatat sceti me is pagus citadis abì ddoi est s'industria de sa tecnologia acorropada. 

E insandus su dinai currit totu a unu logu, fait bullucas, is bullucas si sciopant e s'economia si scònciat.

A s'àtera parti Tim Worstall narat ca nosu iaus a depi essi cuntentus e meda puru ca su spàssiu de oindii, nci dda faint a nosi ddu fai fai, spendendi prus pagu dinai (sene localis, sene cinemas, sene meda genti chi ddoi traballit) e faendi-nosi spendi prus pagu dinai puru e custu bolit nai ca nci dda faeus a tenni una fita prus manna de s'arrichesa de s'economia de spendi po fai àtera cosa. E ca Pokémon GO no tirat una fotografia a su chi no traballat beni de su capitalismu ma prusaprestu a su chi invècias traballat beni.

E bosàterus ita ndi pensais de custa economia de Pokémon GO?

Po ndi sciri de prus
Pokémon Go is everything that is wrong with late capitalism - Vox - Timothy B. Lee
Apparently Pokemon GO Is An Indictment Of Late Stage Capitalism Now - Forbes - Tim Worstall