Apretziadura de is trassas - S'arti de sa gherra (9)

(Figura liada de pixabay)

Sun Tzu iat narau:

Sa faina militari importat meda po su Stadu.
Est chistioni de vida o de morti,
Su Tao de su scampu o de sa sciorrocadura.
Duncas tocat a dda mesurai beni.

Aici, tocat a dda mesurai faendi-ndi contu de cincu cosas,
Apretziai sa chistioni assimbillendi-dda a àteras
Po cumprendi su naturali cosa sua.

Sa primu cosa est su Tao, sa segunda est su celu, sa de tres est sa terra, sa de cuàturu est su generali, sa de cincu est sa manera.

Su Tao est su chi intzidat a sa genti a tenni su pròpriu scopu de chini guvernat,
Fintzas a no si ponni pensamentu de bivi o de morri, sceti po no ddu traixi.

Su celu portat su ying e su yang, fridu e callenti, comenti andant is stagionis.
Su ddu ponni infatu o ddi parai su corru a fronti, seberat a chini bincit.

Sa terra est su chi est artu e su chi est bàsciu, su chi est ladu e su chi est strintu, su chi est atesu e su chi est acanta, is atzas e su pranu, sa morti e sa vida.

Su generali est su sciri, sa fidi, is alientus e sa severidadi.

Sa manera est su sciri cumandai, su Tao de su assetiai s'esèrcitu e de is cosas postas a parti.

A pitzus de custas cosas
No nc'at generali chi no ddas apat intèndias arremonadas.
Su chi ddas connoscit beni at a binci.
Su chi no ddas connoscit at a perdi.

Aici, mesurendi is cosas cunfrontas a àteras,
Fait a ndi cumprendi su naturali.
Pregonta
Cali guvernanti sighit su Tao?
Cali generali est su prus àbili?
Chini cundrexit su celu e sa terra po su profetu cosa sua?
Chini sighit mellus sa manera e is cumandus?
Cali esercitu est su prus forti?
Cali funt is oficialis e is sordaus prus imparaus?
A cali parti premiant e punint cun prus giustesa?
Mesurendi custas cosas cunfrontas a àteras, fait a cumprendi a chini bincit e a chini perdit.

Sa faina militari sighit unu Tao de trassas
Aici, candu ses bonu a fai, fai comenti e chi no siast bonu.
Candu ses biatzu, fai comenti e chi siast stasiu.
Candu ses acanta, fai comenti e chi siast atesu.
Candu ses atesu, fai comenti e chi siast acanta.
Aici, candu su nemigu circat de ndi tenni profetu, para su latzu po ddu imbovai.
Candu est cunfùndiu, assaltilla-ddu.
Candu su nemigu tenit poderi, allaba-ti.
Candu est forti, lassa-ddu a perdi.
Candu est arrabiosu, intzulla-ddu.
Assaltilla-ddu candu no s'est aprontau.
Movi candu no est abetendi-ti.

Custas funt is trassas militaris bincidoras de is antigus.
No fait a ddas lassai in eredidadi chi no arribat s'ora.




No serbint a marolla is lìburus de economia po cumprendi s'economia.
A bortas bastat a ligi su chi scriiat prus de duamilla annus a oi sa genti a s'àteru càbudu de su mundu, po si nd'acatai de comenti is cosas andànt, andant e forsis ant a andai sèmpiri.

Sa primu parti dd'agatais innoi.
Sa segunda parti dd'agatais innoi. 
Sa de tres partis dd'agatais innoi.
Sa de cuàturu partis dd'agatais innoi.
Sa de cincu partis dd'agatais innoi. 
Sa de ses partis dd'agatais innoi.
Sa de seti partis dd'agatais innoi.
Sa de otu partis dd'agatais innoi.