Brexit: ant votau po sceberai a chini cumandat, nudda de prus nudda de mancu.

 (Fotografia de ALAMY, liada de The Telegraph)

Su Rènniu Uniu at votau e Brexit at bintu, sa nova (chi no est prus nimancu nova) custa est.

E duncas imoi iat a tocai a circai de cumprendi ita ddis at a acuntessi a issus (a ita nos at a acuntessi), ma sa cosa est traballosa meda po ita ca, comenti at spantau su referendum insoru, aici podint sighiri a spantai totus is pinnicas chi at a pigai sa chistioni, po su beni e po su mali puru.
E insandus forsis est mellus a dda lassai stai po imoi e a circai de cumprendi ita totu ddoi fiat a palas de custu referendum chi at fatu avolotai s'Europa e su mundu puru.

Duas cidixeddas in antis de su referendum, Ambrose Evans-Pritchard (giornalista inglesu chi scriit de economia po The Telegraph) at scritu unu artìculu narendi a is chi ddu ligint po ita iat a ai votau ca ei (a ndi bessiri de sa UE) puru in mesu a milla trumentus e dudas e sa dii e totu s'economista Dani Rodrik (ndi iaus giai chistionau innoi) at scritu in su blog cosa sua unu àteru artìculu po aciungi su chi ndi pensàt issu de is cosas chi iat scritu Evans-Pritchard.
Su chi nd'est bessiu a pillu est cosa chi iat a depi interessai a totus a ita si bollat chi siat manera chi unu pensit a pitzus de Brexit.
E sa chistioni, mancu narau si bolit, no est s'economia ma sa democratzia.

Rodrik iat giai amostau cun su trilema cosa sua cali est su imperou de custus tempus : no fait a tenni s'ou sa pudda e s'arriali. Tocat a sceberai.
Sa figura asuta (liada de su blog de Rodrik) dd'amostat beni, tocat a sceberai intra de :
  • democratzia + globalizatzioni;
  • democratzia + sovranidadi;
  • sovranidadi + globalizatzioni.

De custas tres cosas (democratzia, sovranidadi e globalizatzioni) fait a ndi sceberai sceti duas in pari, tres no fait.

Ma custu ita nc'intrat cun Brexit e cun su chi at scritu Evans-Pritchard ? Totu nc'intrat. 

Issu arrexonat a pitzus de ita est sa UE e de comenti tirat is odriangus de s'economia e de sa polìtica. De comenti una pariga (a sa sarda) de òminis chi nemus at votau nci dda fatzant a incorrutzai su bolli de is stadus po ddis fai fai su chi bolint issus (leis po su traballu, leis po sa sanidadi e aici sighendi) e de comenti, si puru sa genti no cuncordit prus cun issus e cun su chi faint, no fatzat a nci ddus bogai po ndi ponni àterus. De comenti is leis de sa UE arrischint de carzugai is leis de is àterus stadus boghendi-ndi duncas is fundatzionis abì is populus nd'ant strantaxiau is stadus.
E de comenti in pagus fueddus a issus ddis tochit a sceberai a chini cumandat, su parlamentu insoru o calincunu de is òminis de sa UE.

A Rodrik puru, mancai siat dispràxiu po su iat a acuntessi cun sa Brexit a sa UE e a su Rènniu Uniu puru, ddi tocat a marolla a amiti ca s'idei chi teniat issu de una UE chi nci dda podiat fai a cuncordai globalizatzioni e democratzia fiat una faddina, s'est biu craru craru po comenti ant aconciau is gregus.

E duncas su chi at a acuntessi dd'eus a biri, ma forsis imoi sceraus mellus po ita est chi ant votau.


Po ndi sciri in prus
Brexit vote is about the supremacy of Parliament and nothing else: Why I am voting to leave the EU - The Telegraph - Ambrose Evans-Pritchard
Brexit and the Globalization Trilemma - Dani Rodrik




Brexit: ant votau po sceberai a chini cumandat, nudda de prus nudda de mancu. Brexit: ant votau po sceberai a chini cumandat, nudda de prus nudda de mancu. Reviewed by Andrea Maccis on 14:55 Rating: 5

Nessun commento:

Powered by Blogger.