Is bullucas de Douglas Adams.

Su 25 de maju, ocannu puru che ònnia annu, is amiradoris de Douglas Adams, s'òmini chi at scritu sa Guida Galàtica po is Autostopistas (The Hitchhiker's Guide to the Galaxy), unu lìburu connotu in totu su mundu, ant fatu festa tirendi-si fotografias cun unu sciugamanu o arregollendi-si-ddu avatu totu sa dii, passendi-nci una dii arriendi po no si ndi scaresci de issu e de is lìburus cosa sua (a chini ddus at lìgius sciit po ita est chi su sciugamanu est cosa chi no dda pagat dinai).

Ma, ita nc'intrat Douglas Adams cun s'economia?

Seguru ca oindii totus eus intèndiu a calincunu (in televisioni, in s'arràdiu, me in su giornali) chistionendi de bullucas (nc'at genti chi at bintu puru su Nobel cun custas chistionis) ma faeus comenti e chi no ddu scieus e torraus a nai ita est in economia una bulluca: su tanti chi su prètziu si stèsiat de su chi si ballit a beru sa cosa.

Est innoi sa chistioni bessit toga. Comenti at amostau Dan Smith in su blog cosa sua, Douglas Adams iat agatau una manera spassiosa de contai ita fiant custas bullucas economicas giai in su 1980 (su lìburu fiat The Restaurant at the End of the Universe) chistionendi de su pianeta Frogstar World B (Ranonia B po chini dd'at lìgiu in italianu), labai:

«Medas annus a oi, s'agatàt unu pianeta froriu e prexau - genti, citadis, butegas, unu mundu normali. Foras che me is bias mannas de custas citadis, ca ddoi fiat unu tantixeddu de butegas de sabateris in prus de su tanti chi ddis iat a essi serbiu a beru. E a bellu a bellu, a s'orvidada, su tanti de custas butegas de sabateris fiat crescendi. Est unu fenòmenu economicu connotu ma est lègiu su ddu biri traballendi, prus butegas de sabateris ddoi fiant, prus crapitas depiant fai e prus lègias de portai bessiant. E prus legias de portai bessiant, prus sa genti ddas depiat pigai po si poderai cratzada e prus is butegas cresciant, fintzas a candu s'economia de cussu logu fiat arribada a su chi pensu ddi narant Làcana de su Fenòmenu Crapita, e in cuss'economia no faiat prus a fai àtera cosa si no butegas de sabateris. Arresultau - sciorrocu, arrovina e fàmini. Su prus de sa genti si fiat morta. Cussus pagus chi fiant arresultaus de s'arratza chi andàt beni, fiant bessius pillonis - nd'as biu unu - iant ghetau scuminiga a is peis de issus e totu, maradìxiu sa terra e si fiant postus in giuras de no torrai a caminai mai prus. Cosa mala.»

No serbit sèmpiri unu lìburu de economia po ligi cosas de economia, ni serbit sèmpiri unu lìburu de economia po nci cumprendi calincuna cosa.

*Sa figura de susu est liada de pixabay.

Po ndi sciri de prus
The Douglas Adams theory of economic bubbles - Dan Smith's blog