Su Nobel 2014 : s'economia che cani scapiau de cadena.

Ocannu, che ocannu passau e totu, sa cosa prus spassiosa chi fait a fai castiendi su chi nd'at bogau a pillu sa Cumissioni chi donat su Nobel po s'economia (chi po nai sa beridadi est su Premiu po is scientzas econòmicas chi at postu sa Banca Tzentrali Svedesa po arregordai a Alfred Nobel), est a insertai su chi ant bòfiu nai a su mundu. "Serbint arrégulas" forsis, ca at bintu unu frantzesu, Jean Tirole (61 annus, fait scola in sa Toulouse School of Economics), chi si nci ddoi est ammollau annus e annus, po circai de ammostrai comenti non fatzat a lassai pàsciri tropu a funi longa cuddas sociedadis mannas chi, sene arrégulas, dda finint a tènniri tropu poderi.

Tirole est unu de cussus economistas chi si fichint me in cussus mercaus chi no si ponint a prumu cun su chi narant is libbrus (prétzius bàscius e calidadi arta), cosa chi, a cantu parrit, ddi ballit su Nobel, ca nci dd'at fata a ammostrai a is guvernus cali genias de arrégulas tocat a ndi strantaxai po fai a manera chi is sociedadis mannas sigat a ddis torrai a contu a trabballai, ma faendi puru s'interessu de sa genti.

E funt giai duus annus afat'e pari chi su Nobel ddu bincint economistas chi in su trabballu insoru, no ndi ddis at partu bregungia a nai ca is mercaus no funt sentzerus che sa prama (a su imbressi de su chi narant in sa University of Chicago) ca finit sèmpiri ca su poderi si ddu partzint una pariga de oligopolistas si andat beni, sinunca sceti unu monopolista, poderendi is prétzius de sa cosa artus e sa calidadi bàscia.

Su trabballu de Tirole, chi est inghitzau in su 1980, non at donau una filera de arrégulas nobas po poderai is odriangus a chini parriat sartendi-nci s'arrastru, ma una bisura noba chi aessat potziu prodùsiri políticas nascias ponendi in sa pesa su chi costant e su chi faint guadangiai e oindii est connotu e postu in proi dae is leis de s'Europa, de s'Australia e de àterus logus in su mundu, prus che totu in su cambu de is comunicatzionis.

E duncas su mori est fatu, ma Tirole e totu narat ca a pònniri arrégulas est cosa trabballosa meda, ca oindii serbit chi totu su mundu cuncordit.

Po ndi sciri de prus
The Prize in Economic Sciences 2014 - nobelprize.org
Jean Tirole Wins Nobel in Economics for Work on Regulation - Binyamin Appelbaum - New York Times