Is scotzesus disìgiant s'indipendéntzia o funt timendi-dda?

Comenti si bollat chi finat su referendum scotzesu de su 18 de cadudanni, est securu ca at a mòviri unu trumbullu mannu in totu s'Europa (e giai est movendi-ddu), ca, si bincint is indipendentistas, ndi tirat sa terra dae asuta a is peis a totu cussa genti chi pensat chi sa stória siat inghisciada aici po sèmpiri, si invècias perdint (in su logu abi forsis funt prus fortis e abi de securu tenint prus possibilidadi), aberrit sa crisi po totus is indipendentistas chi circant de ddus stròciri in domu issoru. Custu s'at a biri dae innoxi a una pariga de diis, ma prus che totu, si bincint is indipendentistas, s'at a biri puru si nd'at impastu de s'arretzeta indipendentista (custu peoru s'at a biri dae innoxi a una pariga de annus).

Po s'economia, sa chistioni est aici dilicada (ndi iaus giai chistionau) chi funt fueddendi-ndi totus (economistas, políticus, giornalistas) e cussas chi funt is boxis prus grais e ascurtadas, po nai sa beridadi, no est chi siant ponendi-ddis su frocu a is scotzesus.

Sene si strollicai meda (ca unu iat a pòdiri pensai pascí ita totu, pagamentas, dépidu, trabballu e aici sighendi) sa cosa chi ponit prus pensamentu a custa genti pràtica, parrit chi siat su dinari. Sa chistioni est ca is indipendentistas scotzesus funt promitendi a sa genti, po avotai ca ej in su referendum, ca ant a poderai sa Libba inglesa (Pound Sterling) puru candu si nd'ant a scanciai dae is inglesus.

Mancu nau si bolit ca Krugman, De Grawe, Wolf, Wren-Lewis e àterus meda (nd'agatais unus cantu asuta) candu ant inténdiu aici (sciendi ita est chi ddis acuntessit a is stadus chi portant dinari stràngiu) ant inghitzau a scriri po ndi ddus fai atzicai, ca comenti narat su díciu est mellus a ddu tìmiri che a ddu provai. Ca, totu su chi est ammostrendi s'Europa parrit chi siat po debadas.

Si unu stadu no tenit su dinari cosa sua, no si podit indepidai a interessu bàsciu (ca sa Banca Tzentrali cosa sua no podit assegurai ca si aessat serbiu at a imprentai dinari nou po pagai su depidu) e prus che totu no podit apunteddai s'economia, si serbit, tirendi is odriangus a sa politica monetària.  

E insadus a ita serbit s'indipendéntzia si no ses indipendenti a beru?

Est comenti e chi is scotzesus siant disigendi s'indipendéntzia a una parti e a s'àtera siant timendi-dda, circhendi de poderai sa conca asuta de su paracu de is inglesus, no siat chi protzat. 

Ma cun custas cosas no fait a ddoi brullai, a abarrai a metadi de ingiastu arriscat de fai prus dannu chi no àteru.

Po ndi sciri de prus :
Scots Wha Hae - Paul Krugman
Maastricht in a Kilt - Paul Krugman
Scotland and the SNP: Fooling yourselves and deceiving others - Simon Wren-Lewis
No independence of Scotland with the pound - Paul De Grauwe
Scots, What the Heck? - Paul Krugman
If Scots keep the pound they forgo independence - Martin Wolf
Scottish independence is another financial crisis waiting to happen - John Aziz
Of Course Scotland Can Use The (Scottish) Pound - Frances Coppola