Abenomics : su spantu de is pagas!

De sa Abenomics ndi iaus giai chistionau innoi : ateru non est chi unas cantu arretzetas chi su guvernu de Shinzō Abe, su primu ministru de su Giaponi, est circhendi de ponniri in proi po ndi torrai a strantaxai s'economia issoru e chi, mancu nau si bolit, funt a su imbressi de su chi funt faendi is guvernus europeus po ndi torrai a strantaxai s'economia nostra.

Ma, lassendi a parti totu su chi nc'intrat a deretu cun sa faina de su guvernu suu (intzidus, spesa, depidu, inflatzioni, svalutatzioni), custas diis Abe s'est torrau a incarai dae domu sua, amostrendi a su mundu unu ateru arrogu de sa bisura noba (a su mancu cunfrontas a is ideis prus sighidas oindii) chi tenit issu po su stai beni : s'economia de unu logu est sana candu crescit po ita ca sa genti stait mellus.

E custu dd'at nau craru in unu articulu chi at scritu po Project Syndicate.

Fintzas a ocannu passau (candu est inghitzada sa Abenomics), su Giaponi fiat a su mancu dae 20 annus cun s'economia firma (stagnatzioni) e totu su chi Abe at fatu est moviu dae sa gana de arresolviri custu problema.

Castiendi is numerus giaponesus, issu narat ca si nd'est atzicau prus che totu candu si nd'est acatau de comenti fiant andadendi is pagas : dae su 2000 is pagas ndi funt caladas de su 0,8% nominali onnia annu, contras a su 3,3% chi cresciant in USA e UK o su 2,8% chi cresciant in Frantza (bastat a tenniri in contu ca in su 1997 su tanti tirau in pagas in totu su Giaponi est stetiu de 279 trilionis de ¥ e invecias in su 2012 sceti 244.7 trilionis de ¥).

E duncas ddis est benida s'idei : su spantu de is pagas (wage surprise), chi depit serbiti a ndi torrai a bogai a pillu unu de is fundorius de s'economia, ca produtividadi e pagas depint andai a manu pigada.

Abe narat ca s'idei ndi dd'ant furada a is olandesus, chi me is primus annus 80, nci fiant arrennescius a fai una genia de acordiu (Wassenaar Agreement) intra meris e operaius, abi si cuncordaat ca su graiori de s'inflatzioni (chi in cussus tempus curriat a beru) tocat a dda partziri in manera chi onniunu aessat fatu sa parti sua.

E aici Abe nci dd'at fata a fai arrexonai in pari meris, sindacaus e ministrus (si funt atobiaus una bella pariga de bortas inghitzendi in cabudanni de ocannu passau) e in pari e totu ant cumprendiu ca po afortiai s'economia faendi-dda caminai in unu mori sentzeru, sa genti depit tirai pagas prus artas, po podiri spendiri de prus. 

E innoi est sa bellesa de s'arresultau : nemus at obligau a nemus a fai nudda. 

In pari (e giai medas impresas mannas e piticas ant promitiu e funt aprontendi is cosas po cresciri is pagas e fai tirai prus dinari a sa genti chi trabballat, mancari donendi bonus) ant cuncordau ca non fait a cresciri si non si crescit totus in pari e custu non sceti po umanidadi o bonu coru : est a sa saludi de s'economia chi ddi serbit chi nc'apat meda genti chi podit spendiri dinari.

Sa impellida chi at donau su guvernu de Abe, parrit chi nci dd'apat fata a fai passai su disisperu a is Giaponesus e totus in pari, parrit, funt incarreraus conca a una manera noba de tirai is odriangus a s'economia.

Issu est seguru ca su chi est faendi at a portai frutu (su spantu de is pagas est ca su chi si nd'at a tenniri in prus at a essiri de prus de su chi si nd'at a tenniri in mancu po nexi de is pagamentas chi ant a cresciri aici e totu) e po nai sa beridadi giai calincuna cosa inghitzat a s'apubai. 

Nosu invecias, aeus a biri.

Po ndi sciri de prus

Japan’s Coming “Wage Surprise” - Shinzo Abe