Nexi de su depidu publicu est? Frenkel e s'Europa.

Roberto Frenkel est unu economista connotu po is studius a pitzus de sa crisi de s'Argentina, partida dae is annus noranta e sighida fintzas a su 2001, studius apretziaus e sighius immoi dae aterus economistas.

Est gratzias a issu chi sciieus ita incapitat a is stadus debilis chi acapiant su chi ballit su dinari issoru cun su chi ballit su dinari allenu prus forti.

Est po cumbatiri s'inflatzioni, chi s'Argentina in su 1991 iat acapiau su dinari suu a su dollaru americanu (1 pesu = 1 dollaru). Totu su chi n'est beniu, est su chi oindii si tzerriat filera de Frenkel (Frenkel cycle) e si podit partziri in seti partis.

1) Is leis chi arregulant comenti si movit su dinari allenu bessint prus debilis.

A intru de s'area valutaria fata (acapiendi su dinari a pari) benint fatas leis chi serbint a fai bessiri prus pagu strintas (o a ndi ddas bogai propiu) is arregulas chi serbint a fai moviri is capitalis.  

In Europa custa liberalizzatzioni est inghitzada in su 1988 e finida in su 1999, candu est intrau s'Euro.

2) Is capitalis inghitzant a arribbai a is orus de s'area valutaria.

Una borta chi su dinari podit andai a traessu e a manca sene problemas a intru de totu s'area valutaria, inghitzat a si moviri dae mesu (core) e duncas dae is chi funt is economias prus fortis, e arribbat a is orus de s'area valutaria (periphery) e duncas a is chi funt is economias prus debilis. 

Po ita? Po ita ca is chi imprestant su dinari nci guadangiant prus interessu in sa periferia e non arriscant de nci perdiri totu (o una parti de) su chi nc'ant postu, po ita ca su cambiu est assegurau (non nc'at a essiri svalutatzioni).

3) Su PBN (Prodotu Brutu Natzionali) crescit in sa periferia e aici e totu su depidu publicu ndi calat.

Totu custu dinari friscu chi intrat, fait profetu a is famillias, chi spendint de prus e faint cresciri su tanti domandau (demand) e a is impresas e duncas su PBN (GDP - Gross Domestic Product) crescit e a marolla crescit puru su chi imbucat a su stadu, chi po is necessidadis cosa sua est sempiri prus pagu tentu a si indepidai. Alloddu ca inghitzat a ndi calai puru su depidu publicu.

4) S'inflatzioni crescit, su depidu privau crescit.

Su cresciri de su tanti bendiu e de is investimentus fatus, fait cresciri is pretzius ma non cunformas a su chi crescit s'economia, po ita ca abarrat drogada dae su dinari chi intrat dae foras. Po custu su depidu privau non fait ateru chi cresciri e si unfrant is bulucas atzionarias e imobiliaris. 

(Una buluca est su tanti chi si stesiant su chi ballit a beru una cosa e su chi costat cussa cosa).

5) Si tzacat sa buluca de su depidu privau.

In su mentris chi parrit chi totu siat andendi beni, est propiu insandus chi calincuna cosa chi sutzedit a tesu arrovinat totu : unu burdellu in foras dae s'area valutaria ingollit o ndi fait atzicai a is chi prestant su dinari e issus serrant su grifoni a sa periferia, chi immoi depit sighiri a curriri cun is peis suus.

In Europa custu est sutzediu candu nd'aeus cassau sa sciustura de sa Lehman Brothers in su 2008.

6) Su depidu publicu comintzat a torrai a cresciri.

Comenti inghitzat a amancai su dinari dae foras, is periferias, chi fiant drogadas dae su dinari allenu, intrant in recessioni, su depidu publicu inghitzat a torrai a cresciri, su chi spendit sa genti inghitzat a ndi calai e is stadus puru a marolla inghitzant a segai su chi spendint, cosa chi aviat sa recessioni e dda fait peus puru de su chi fiat.

7) Sa periferia si ndi scanciat dae s'area valutaria.

Est immoi, cun is cosas chi andant mali meda, sene spera de si ndi torrai a strantaxai, chi is stadus cun is economias prus debilis, cussus de sa periferia, ndi bessint dae s'area valutaria e duncas scapiant su dinari issoru dae su dinari allenu forti.

Parrit chi s'Europa oindii siat firma in mesu a is puntus 6 e 7.

Chistioni de tempus, parrit, non nc'at segurantzia. Su chi parrit seguru est ca su depidu publicu, cun totu custu burdellu, non nc'intrit nudda.

Po ndi sciri de prus
La crisi dell'Eurozona è un problema di debito pubblico o privato? Per chi segue il ciclo di Frenkel non ci sono più dubbi - Vito Lops
Lessons from a comparative analysis of financial crises - Roberto Frenkel
Il romanzo di centro e di periferia - Alberto Bagnai
Lessons from Financial Crises - Roberto Frenkel
From the boom in capital inflows to financial traps - Roberto Frenkel