Is stadus chi tenint s'Euro, funt indepidaus in dinari strangiu?

In medas oindii funt de acordiu ca sa crisi de s'Europa est nexi prus che totu de s'Euro po ita ca is stadus chi nci perdint su poderi de si fai su dinari issoru, funt prus debilis e non nci dda faint a cumbatiri su chi sutzedit a pustis de onnia crisi : sa genti e is mercaus si nd'atzicant luegu e totu e tocat a ddus axudai a s'asseliai.

Custu funt narendi-ddu Paul Krugman, Paul De Grauwe e aterus economistas giai dae tempus meda e a pagu a pagu totus funt cumprendendi sa chistioni : a si indepidai in Euro est giai giai comenti e si indepidai in dinari strangiu, po ita ca sa BTcE (Banca Tcentrali Europea) non sempiri axudat faendi fiantza a totu su depidu de is stadus e custu fait timiri a is meris de su depidu chi nci potzant perdiri lati e casiddu. 
E de cantu custu siat berus nd'aeus giai chistionau amostrendi comenti sa BTcE nci siat arrenescia sempiri (candu si ddoi est posta) a abasciai o a poderai basciu su spread.

Ma pagus tempus fait, duus economistas, Giancarlo Corsetti e Luca Dedola, ant amostrau ca forsis sa chistioni est prus intrebeddada puru.

Candu una banca tcentrali fait fiantza a su stadu indepidau, bolit nai ca forsis dd'at a tocai a fai dinari nou po ddi pagai su depidu o po ddu pigai cussa e totu po poderai bascius is interessus (si sciit ca su mercau finantziariu funtzionat a s'imbressi de unu mercau normali : candu crescit su tanti domandau is pretzius ndi calant).
A fai dinari nou perou, in una manera o in s'atera nci dda fait a fai cresciri s'inflatzioni o prus che totu s'inflatzioni chi si pensat chi nci at a essiri e custu puru portat unu dannu avatu : su de ndi fai atzicai a sa genti e a is mercaus cun sa timoria est chi su dinari ballat prus pagu e duncas is depidus aici e totu.

Serbit duncas chi onni manixu chi benit fatu cun su dinari tengiat credibilidadi.

Sa beridadi est ca non sempiri serbit chi una banca tcentrali fatzat dinari nou po pagai is depidus de is stadus o po fai asseliai a is mercaus : bastat chi ddu promitat. E chi perou fatzat a nci creiri a su chi est promitendi.

Ma prus che totu serbit chi su guvernu manixit sa fiscalidadi po su chi ddi spetat e duncas chi guvernu e banca tcentrali siant incarreraus conca a su matessimu logu, cun sa banca chi fait fiantza a su guvernu ma cun su guvernu (su ministeru de su tesoru po nai sa beridadi) chi promitat a sa banca de aparixai is problemas chi ndi podint beniri dae is politicas monetarias.

Corsetti e Dedola narant ca forsis sa nexi prus manna de sa debilesa de s'Unioni Monetaria Europea ndi benit propiu dae custas chistionis :

- sa Banca Tcentrali Europea non fait su chi iat a depiri fai;
- is Guvernus non faint su chi iant a depiri fai;

e duncas non nc'at manera de fai nisciunu acordiu po fai cosas chi s'afortint a pari, po ita ca seus chistionendi de una unioni monetaria intra stadus indipendentis (chi indipendentis s'unu dae s'ateru parrit chi bollant abarrai) guvernanda dae una banca tcentrali chi est cussa puru indipendenti (a su mancu iat a depiri essiri) dae is stadus.

Candu sa tropu indipendentzia noxit ...

Po ndi sciri de prus
Who Has Draghi’s Back? - Paul Krugman
Is the euro a foreign currency to member states? - Giancarlo Corsetti and Luca Dedola
Is stadus chi tenint s'Euro, funt indepidaus in dinari strangiu? Is stadus chi tenint s'Euro, funt indepidaus in dinari strangiu? Reviewed by Andrea Maccis on 22:01 Rating: 5

Nessun commento:

Powered by Blogger.