Criminalidadi e disocupatzioni.

«Nanca funt imbuchendi a furai a is domus.»
«A marolla, cun totus is piciocheddus chi nc'at sene fai nudda, arreu fintzas a àteras oras de noti!»

Cantu bortas dd'eis intèndiu? Me is biddas s'intendit fatu fatu. Est una de cussas cosas chi narat sa genti manna e chi fait scarangiai a arriri. E invècias, si Ioannis Laliotis, unu circadori de sa Surrey University, at pensau ca ndi balliat a fai unu paghiteddu de traballu po circai de cumprendi si sa disocupatzioni e sa criminalidadi siant duas cosas acapiadas a pari, tontesa tontesa no depit essi.

Sa microeconomia narat ca su costu oportunidadi de sa criminalidadi est funtzioni negativa de sa disocupatzioni, lassendi cumprendi ca is duas cosas potzant andai a manu pigada (crescit s'una e crescit s'àtera) ma tocat a nai puru ca calincunu economista at bogau a pillu puru teorias chi narant ca is cosas podint andai puru a su imbressi (crescit s'una e si torrat s'àtera) e is studiosus de sociologia no est chi apant fatu meda po stroghillai sa chistioni, casi ca nci dd'ant fata a donai arrexoni a s'una e a s'àtera teoria, cun unus cantus traballus issoru. Duncas no abarràt àtera cosa de fai si no a castiai su chi acuntessit a beru in calincunu logu.

Cali mellus logu de sa Grècia? E difatis su paperi chi at scritu Laliotis (chi est aregu, mancu nau si bolit) ponit a pari pròpiu is nùmerus de sa criminalidadi e de sa disocupationi in Grecia, de su 1999 a 2013, po is aregus mascus, pigaus regioni po regioni. 

Su chi nd'est bessiu a foras ponit pensamentu e forsis nosi imparat puru ca no fait a si nd'arriri meda candu sa genti manna chistionat, ma iat a tocai a ascurtai e a nci pensai beni in antis de aciungi.

Sa filera de contus traballosus a cumprendi e a fai chi nd'at strantaxau Laliotis (chistioni de logaritmus prus che totu), amostant ca de su 2009 a su 2013, su tanti chi est crèscia sa disocupatzioni in Grècia at fatu cresci sa criminalidadi in totu e puru una bella pariga de crìminis pigaus a unus a unus (chistionis de droga,  crìminis contras a sa persona). Pighendi totus is annus invècias (de su 1999 a su 2013), sa disocupatzioni parit chi apat fatu cresci totu sa criminalidadi a su pròpiu, ma s'acapiu parut chi siat prus dèbili.

Su traballu serrat narendi ca po cumprendi mellus, tocat a ddus forrogai de prus is nùmerus, ma giai su chi est bessiu a pillu, amostat beni conca a cali parti tocat a sighiri a circai.

Po ndi sciri de prus 

Crime and Unemployment in Greece: Evidence Before and During the Crisis - Ideas - Ioannis Laliotis

Crime and Unemployment in Greece: Evidence Before and During the Crisis - Ioannis Laliotis

*Sa figura de susu est liada de pixabay