S'economia de Harry Potter.

S'economia, a bolla o a marolla, nos'atumbat ònnia dii, siat po is cositeddas che po is cosas mannas e a ndi sciri, tocat a nai sa beridadi, fait profetu a totus. Fatu fatu sa chistioni torrat a sa scola e a comenti iat a depi fai po agiudai a is piciocheddus a callai a cerbeddu, donendi-ddis puru, in pari a totu s'àteru, a su mancu una arrembrilladedda de economia, su tantixeddu po nci dda picigai a si baghillai in butega o a cumprendi su chi acuntessit cun su dinai, cun su dèpidu e aici sighendi.

A duas studiosas americanas de economia, Darwyyn Deyo e Marta Podemska-Mikluch, ambaduas studiadas in sa George Mason University, sciendi ca a is piciocheddus fait a ddus fai imparai mellus imboddiendi-ddis is cosas cun su chi ddis praxit, ddis est beniu a conca de ghetai unu ogu a biri comenti traballat s'economia in unu de is lìburus prus lìgius (e de is filmis prus castiaus) de sa piciocalla: Harry Potter. 

Totu su chi nd'est bessiu a pillu, dd'ant postu in pari in unu artìculu publicau de sa SSRN (Social Science Research Network), amostendi comenti fatzat a portai Harry Potter in pari a calincunu lìburu tènnicu, po imparai s'economia a is piciocheddus de scola.

S'idei de sa scarsidadi (scarcity), est forsis sa primu cosa chi tocat a cumprendi candu si imparat s'economia (innoi puru nd'eus chistionau prus de una borta), ca de ònnia cosa nci nd'at pagu e prus pagu nci nd'at e prus genti ndi bolit e prus crescit su prètziu. Ma comenti fait unu lìburu che Harry Potter a agiudai a cumprendi una cosa aici? Sa cosa chi lassat spantaus est ca puru unu mundu de brùscias no nci dda fait a si ndi scabulli de sa scarsidadi. Mancai fatzat a fai aparessi e sparessi sa cosa, mancai fatzat a dda cambiai de bisura o a ddi ghetai marzinas, no fait a dda fai de belle nou, boghendi-nde-dda de s'airi, prus che totu si seus chistionendi de cosa de papai o de dinai (ddu narat sa Lei de Gamp).

Se segunda cosa chi iat a tocai a cumprendi chistionendi de economia est s'idei de costu oportunidadi (opportunity cost), eus a nai su chi ti costat a sceberai de fai una cosa invècias che un'àtera. Mancu nau si bolit, is lìburus de Harry Potter funt prenus de scioberus aici. Candu a Harry ddi ponint su capeddu in conca po sceberai a cali domu ddi iat a essi tocau a tramudai, candu depit scioberai de arriscai sa vida po bociri a Voldemort, candu depit scioberai de si nci ghetai a su stàini cungelau po ndi piscai sa spada chi nci dda fait a arrogai is Horcrux, sceti po ndi nai calincuna, sa chistioni est sèmpiri de sceberai e ònnia sceberu tenit su costu cosa sua, puru me in Hogwarts.

Sa de tres cosas chi iat tocai a cumprendi po imprabastai a su mancu calincuna chistioni economica de pagu contu, est s'idei de utilidadi marginali (marginal utility) chi àteru no est che su guadàngiu chi fais aciungendi unu tantixeddu de una cosa a sa chi tenis giai. Sa chistioni est ca prus aciungis e prus pagu su chi aciungis si ballit su chi costat. Mancai parrat strambu, pensai de papai pani candu seis famius e de sighiri a papai pani candu seis pràndius, finit chi su pani si noxit, duncas su primu pani chi papais si ballit de prus, sighi po sighi s'àteru pani chi si papais ballit sèmpiri prus pagu. Alloddu, Hermione, maca e pèrdia po sa scola, in su de tres lìburus de su contu, inghitzat a torrai acou in su tempus cun una arratza de arrelògiu de brùscia po acudi totus is letzionis e dda acabat sballada po su tropu stragu. Su tropus strùpiat, mancai scipiast fai marzinas.

Sa de cuàturu cosas est s'idei de is intzidus (incentives), nudda de prus, chi, comenti narat su nòmini e totu, intzidant a sa genti a fai calincuna cosa. De custas cosas puru, su contu de Harry Potter est prenu, ma forsis sa chi amostat mellus sa chistioni est candu Lucius Malfoy arregallat is scòvuas nobas (Nimbus 2000) a sa scuadra de Quidditch, po fai a manera chi su a fillu Draco dd'essant pigau a giogai, casi ca Harry puru giogàt e Draco fiat sangiosu.

Prus de custu, is lìburus de Harry Potter faint a cumprendi su profetu chi fait su mercau lìberu, amostendi comenti is brùscias e is mazineris si pinnichint a pari po bendi e pigai cosa (Hogsmead, Diagon Halley e Knockturn Alley), comenti a si partziri su de fai fatzat fai prus tretu cun is cosas (Harry cun Ron e Hermione in pari funt prus fortis de Draco a solu e puru de Voldemort), o comenti su traballai fatzat fai sienda e fatzat stai mellus (George e Fred aberrint una butega de giogus).

Capassu ca de oi, chini at lìgiu is lìburus de Harry Potter, ddus podit castiai a un'àtera manera puru.

Po ndi sciri de prus:
It's Just Like Magic: The Economics of Harry Potter - SSRN - Darwyyn Deyo, Marta Podemska-Mikluch

*Sa figura de susu est liada de Wikipedia