Su Nobel 2015 : scedatzai a fini po cumprendi.
E ocannu puru est arribbada sa dii de su Nobel po s'economia. In su 2013 dd'iant partziu in tres, ocannu passau fiat tocau a unu frantzesu e ocannu invècias (lunis, su 12 de su mesi de ladàmini) dd'at bintu unu scotzesu, Angus Deaton (professori in sa Princeton University) po su traballu cosa sua a pitzus de comenti sa genti spàciat sa cosa, a pitzus de sa poberesa e de su stai beni.
Po cumbati sa poberesa e po ndi strantaxai una manera de fai stai beni a totus, tocat a marolla a castiai comenti sa genti est avesa a spaciai sa cosa e su chi prus at cumpudau is nùmerus (faendi-si agiudai puru de is computers, unu bellu arregallu de is ùrtimus annus) circhendi su càbudu de sa chistioni, est de seguru Deaton, comenti at nau sa Banca Svedesa candu at "ghetau sa grida" narendi ca su prèmiu dd'iat bintu issu.
Po annus, su sangunau Deaton, est bessiu a pillu in mesu a is àterus sangunaus de is economistas chi fiat capassu ca podiant binci su Nobel e mancai ddi fessit amancada una teoria a nòmini suu o una de cuddas scobertas chi faint connosci un'òmini in totu su mundu, is àterus economistas e totu narànt ca ddi minesciat a su pròpiu a binci, casi ca fiat issu chi ndi iat strantaxau sa manera de scedatzai a fini is nùmerus in economia, cosa chi imoi, prus e prus, acostumant a fai is àterus studiosus puru po fai torrai is contus.
A issu, cosas che mesurai is poberus comenti e genti chi tirat prus pagu de 1$ a sa dii, no ddi funt mai praxas, ca po si baghillai in mesu a chistionis fungudas aici, tocat a nci calai meda prus a fundu e no fait e pensai de arresolvi a lestru faendi unu fasci mannu de genti chi parit oguali ma oguali no est.
Po nai, me is circas cosa sua at scobertu ca comenti crescit su tanti chi tirat sa genti, crescit sa sunstàntzia chi ddis donat su papai (is calorias) casi ca su dinari si ddus fait a papai mellus, ma custu fintzas a unu certu tanti (est craru po is arricus ballit prus pagu casi ca papant giai beni puru si no ddis crescit sa paga). Su malu est ca castiendi is nùmerus totus in pari (arricus e poberus) no ndi bessit a pillu cantu amelliorit su papai de is poberus candu ddis crescint is pagas, e po ddu scerai est tocau a arrefinai.
E forsis totu custu interessu po sa manera chi s'economia amelliorat sa vida ndi ddi benit de candu fiat piciocheddu, ca est nàsciu e pesau in Edimburgo, unu logu tristu e nieddu, narat issu, chi ddi faiat bisai de si fui a logu de mari e de soli.
Deaton est seguru ca po fai unu traballu bonu, tocat chi sa teoria nci arrennèsciat a sboddicai totus is pinnicas de is cosas chi acuntessint a beru, sinunca, si sa teoria no nci dda fait, est comenti e no ai fatu nudda e totu, ca no cumprendeus de ita seus chistionendi e ita seus castiendi.
In pagu fueddus, su de ocannu est unu Nobel a sa passièntzia de castiai beni is cosas, calidadi chi no tenint totus is economistas.
The Sveriges Riksbank Prize in Economic Sciences in Memory of Alfred Nobel 2015 - nobelprize.org
Nobel in Economics Given to Angus Deaton for Studies of Consumption - Binyamin Appelbaum - New York Times
Su Nobel 2015 : scedatzai a fini po cumprendi.
Reviewed by Andrea Maccis
on
21:03
Rating:
Reviewed by Andrea Maccis
on
21:03
Rating:
Fessit sceti a is economistas chi ddis amancat custa calidadi! Nos puru, su prus de is bortas, si firmaus giai sèmpiri a su croxu de is cosas, poita ca comenti naras tui, po cumprèndiri beni, nci bolit passièntzia. E conca. Po cussu su prus de is bortas arrennescint a si fai crèiri allu po cibudda.
RispondiEliminaMa s'anàlisi de datus e nùmerus, fata comenti si spetat, est un'aina stravanada po cumprèndiri su mundu. Fintzas in sardu!
Ps: Praxili meda su fueddàriu ("campo semantico") chi as imperau po scriri cust'artìculu.
CristianU
Gràtzias CristianU!
EliminaSeu sèmpiri circhendi de biri si fait a chistionai de economia in sardu e parit chi fatzat e totu ;-)
Fait, fait... Fait a chistionai de totu, bastat a agatai is fueddus bonus. Candu apu lìgiu cust'artìculu tuu, m'est bènniu a conca una cosa chi apu provau a fai deu puru unas cantu diis fait (partendi de unu artìculu chi imu lìgiu), e s'acàpiu est pròpiu in su fatu de "scedatzai" e "arrefinai" is cosas, po circai de cumprèndiri beni. Su contu est sèmpiri cuddu: economia, arricus e pòburus, manovras e manìgius lègius. Chi no ti prengu tropu su logu ti ddu pongu innoi. M'as a nai, chi ndi tenis gana, mi fai prexeri a si pònniri faci a pari, po fai crèsciri sa lìngua sarda e fintzas is bideas.
RispondiEliminaIn bonora siast, CristianU
Su 26 de austu, in sa rivista on-line Internazionale, est bessiu un'artìculu bellu meda de sa giornalista Roberta Carlini. Bellu meda poita, partendi de nùmerus, datus e gràficus, e fadendi duus contus, si podit biri ca custa bidea de ndi tirai s'Imu no est chi cumbengat pròpiu a totus. Antzis, incapas cumbenit de prus a chini prus pagu nd'iat a tènniri abisòngiu.
Poneus, narat sa giornalista, ca arrennesciaus a agatai is tres, cuàturu miliardus chi serbint po fai custa manovra.
In Itàlia seti famìlias asuba de dexi funt meris de sa domu innui bivint. Duncas ndi bessit a foras ca custu fatu iat a pòdiri cumbènniri a medas. Asinuncas, scrit sa Carlini, s'Imu «no iat a èssiri su tema chi ndi torrat a pillu in ònnia campànnia eletorali».
Ma chi provaus a cumprèndiri chini funt custus italianus meris de domu, chi provaus a fai unu identikit, ita podeus scobèrriri?
Chi pratzeus in cincu fàscias ("quintili" iat a èssiri su fueddu giustu) is famìlias, pighendi po metru su salàriu, bireus ca in sa fàscia prus bàscia de sa scala sotziali (chi andat de 0 a 14.457 eurus s'annu) sceti su 34 po centu est meri de una domu. In sa fàscia prus arta, de is chi guadàngiant prus de 42.574, sa percentuali de is chi tenint una domu àrtziat a su 91,30 po centu.
Cali est su suci de custu datu? Intra de is chi nd'iant a tènniri prus abisòngiu funt sceti in tres asuba de dexi a èssiri tocaus de custu provedimentu, mentras, intra de is chi no ndi tenint abisòngiu giai totus (noi asuba de dexi).
Pigaus imoi un'àteru metru: s'atividadi professionali. Is famìlias de operàjus meris de domu funt su 47,5 po centu, mentras chi pigaus sa classi dirigenti sa percentuali est de s'85 po centu.
Su suci de custu datu puru est craru, no?
Ma segundu sa giornalista, «chi custas categorias antigas (operàjus e dirigentis, pòburus e arricus) important pagu a Renzi, meda prus de importu iat a dèpiri èssiri po su staff econòmicu suu sa chistioni de s'edadi: sa percentuali de meris [de domu] calat a su 45 po centu prus o mancu in sa fàscia cun meri de famìlia “giòvunu”, 34 annus o prus pagu.
[…] A s'interis, is meris de domu ddus agataus de prus in is fàscias “bècias” de italianus, cun una punta de su 76,7 po centu in sa fàscia chi andat de 55 a 64 annus».
Serrendi beni s'arrexonamentu de sa Carlini: chini, in Itàlia, est siguramenti meri de domu? Unu dirigenti (su fueddu fait càpiri a ìnturu, mancu serbit a ddu nai, setoris diferentis) chi guadàngiat prus de 42.574 èurus e tenit prus de 55 annus.
E chini, imbetzes, est pagu probàbili chi siat meri de domu?
Unu operàju (custu fueddu puru tocat a dd'acapiai a setoris diferentis) chi arribat a guadangiai màssimu 14.457 èurus e chi tenit 34 annus (o prus pagu).
Is giòvunus, narat sa Carlini, ancora una borta depint abetai.
E tenit axiu Renzi a nai ca custa misura est giusta: a parti is chi ddu narant poita ca tenint is interessus intzoru, ddu narant is fatus, is nùmerus (chi sa Carlini pigat de Bankitalia) ca custa manovra est una cosa caddotza de a berus, ca est a un'atza, pèndia, e fintzas chentza de morali.
Ah biis ca gei fait e totu a scriri de economia, gei tenia arrexoni :-D
EliminaTorrendi a su chi as scritu, pensu chi tèngiast arrexoni narendi ca candu ndi bogant calincuna pagamenta, ddu faint prus che totu ca a sa genti arrica, sa chi tenit poderi, ddi fait profetu. Est sa stòria de s'òmini chi traballat aici : chini tenit dinari cumandat e chini cumandat sceberat su de fai.
Ma stesiendi-nci de custu, su chi mi ponit pensamentu a mimi no est nimancu po ita est chi ndi ddas bogant is pagamentas (ca a calincunu lillu est seguru ca ddi cumbenit) ma po ita est chi ddas torrant a pònniri.
Lassa-mi-ddu nai mellus.
Sa IMU est una pagamenta patrimoniali annò? E su dinari chi coberant ita funt ponendi-ddu a fai? Po su stadu? Uhm ...
Si ponint una patrimoniali no est spantu meda, mi fait spantu invècias candu dda ponint e sa Banca Tzentrali Tedesca narat «The public acceptance and political enforceability of a one-off capital levy could be enhanced by deploying it as an instrument of income redistribution» chi tradùsiu est a nai ca po fai a manera chi sa genti no si chescit po custa pagamenta, tocat a ddis nai ca serbit a agiudai is poberus mancai no siat aici (http://www.bundesbank.de/Redaktion/EN/Standardartikel/Topics/2014_01_28_monthly_report_box.html).
Duncas su chi mi timu deu est ca s'afroddiu de fai partis a is poberus (chi seus nosu e totu) finat invècias po nosi fai fai partis a Jens Weidmann :-D
Ita ndi pensas?
Eh eh... innoi seus intrendi a ìnturu de is cosas, seus andendi a fundu beni, mi nci ses traghendi a unu mundu chi siguramenti tui connoscis mellus de mei (tanti po ti ndi nai una: mi seu dèpiu circai e chini fiat custu Jens Weidmann, ca miga ndi fimu siguru siguru!) e si bit puru de su fatu ca a is arrexonamentus tuus nci ponis is acotzus de links, nùmerus e totu su chi serbit.
EliminaMa giai chi nci seus sigheus a scedatzai (po su chi mi potzu permìtiri de fai, eh).
Dd'as nau tui: chini tenit dinari cumandat e chini cumandat sceberat su de fai. E, aciùngiu deu, sceberat su chi sa genti depit pentzai. E custa cosa est fàcili, poita ca, torrendi a pigai unu càbudu de una cosa chi apu scritu innoi, sa genti, ca seus nos e totu, no tenit gana de pentzai, no tenit gana de si pigai su chi ddi spetat.
Unu contu est su dinari. E dd'eus cumprèndiu. A s'àteru càbudu, in prus, ddoi est un'àteru contu/chistioni: sa cultura, s'istrutzioni (su cumprendòriu!) chi po mei est, innantis de totu, capacidadi de biri is cosas e de si ndi fai una bidea, de ndi chistionai. Difati, s'àteru morigu mannu de custa borta passada est sa riforma de sa scola. Ca miga est fata aici tanti po fai!
Speru de no m'èssiri atrobeddau tropu! Su suci de su chi bollu nai est ca totus is manovras/morigus chi faint serbint po cuncordai e fai girai beni s'arroda de s'economia (intzoru) e in custa economia serbit genti tonta, comenti est acontessendi de ndi bessiri nos e totu. Sèmpiri de prus.
A custu puntu lompit Jens Weidmann chi narat ca ddu funt fadendi po is pòburus, e nos podeus pentzai puru ca siat aici. Ma tanti, torru a nai, su chi importat est su chi parit, no su chi est: a sa prus parti manna de sa genti andat beni aici.
Onnia tanti si poneus infatu de si concas finis chi s'inditant sa rivolutzioni e tiraus a innantis. O nò?
Eh ... tenis arrexoni, a sa genti sene scola est prus pagu traballosu a dda poderai acapiada, fait puru a dda fai pasci a funi longa ca tanti sèmpiri inguni abarrat.
EliminaMa nci nd'at puru un'àtera calidadi de genti chi po mimi no est traballosu a ddi tirai is odriangus : sa genti chi sighit s'ideologia polìtica comenti e chi fessat sighendi a Deus.
Est po cussu chi megà de nai cudda cosa. A mimi, fatu a proletàriu, candu Weidmann e sa genti de manca pensant de fai sa pròpiu cosa, no mi torrat meda, mi tzichìrriat :-D
Est siguru ca is contus no torrant. E tando iat a tocai a arrefinai un'àtera chistioni: ita bolit nai "genti de manca"? Poita ca Weidmann fait su traballu suu, cunforma de s'idea sua de su mundu e de sa sotziedadi. Ma is àterus? Ita bidea tenint?
RispondiEliminaPo cussu deu megamu de nai ca unu contu est su chi est, e un'àteru est su chi parit!
Eh, ma a ndi sboddicai totus is pinnicas nci nd'iat a bòlliri! :-O
Eheh, tenis arrexoni torra! Iat fintzas a tocai a ndi scriri de ita est de manca e de ita est de dereta, po s'economia a su mancu, ca nc'at genti meda chi parit cunfùndia.
EliminaE torraus abì eus inghitzau : totu su muntoni de cosas chi nosi nci scàrriant asuba, tocat a marolla a ddu scedatzai po nci cumprendi calincuna cosa.