Libbrus chi tocat a ligiri : Storia facili de s'economia italiana dae s'Edadi Mesana a oi.

Is fueddus chi aberrint custu libbru (Storia facile dell'economia italiana dal Medioevo a oggi, Carlo M. Cipolla - Mondadori, 1995) forsis amostrant giai a solus po ita iat a tocai a ddu ligiri : «Sa storia nosi narat a chini seus e dae abi ndi seus benius. In prus sa storia importat po su tempus de oi, puru po ita ca axudat a nosi ndi scabbulliri dae is problemas chi nosi scorant. Non, labai, donendi-nosi arretzetas aprontadas po ddas cuncordai, ma a manera meda prus fini, inditendi e amostrendi-nosi comenti custus problemas funt nascius e ndi funt bessius a pillu. Sa genti chi non connoscit sa storia sua, duncas est genti chi non connoscit nimancu a issa e totu e chi dd'at a essiri grai a si ndi scabbulliri dae is problemas chi ddi tocant.»

Non est una novidadi chi serbat a torrai acou po cumprendiri su chi sutzedit oindii, ma est sempiri spantosu a biri comenti sa storia nci arrennesciat a axudai a ligiri s'economia, prus che totu candu centunorantotu paginas sceti, nci dda faint a alluiri sa luxi, una bella luxi frida, a suba de sexi seculus.
Lestru, curtzu e grai, aici est custu libbru, ma de cussa arratza de graiori chi allebiat e non po ita ca narat cosas spantosas o stravanadas, antzis a su imbressi, sceti cosas sene nisciuna originalidadi, cosas chi ligias chi ddas apas ti parrit de ddas ai sempiri scipias ma de non nci ai mai pensau a beru.

Ndi castiaus una pariga.

S'Italia, narat Cipolla, est unu stadu poberu de materias primas (si ndi bogaus su marmuri) e duncas a marolla ddi tocat a importai totu su chi non tenit. Comenti est chi custu s'acapiat cun s'abritiu de esportai chi tenit? 

Non est grai a ddu cumprendiri : po comporai cosa dae is strangius tocat a portai su dinari po dda pagai e custu dinari dae abi ndi benit? Dae sa cosa chi si bendit a is strangius. Arratz'e spantu po is meris de domu, annò? Si spendis prus de su chi coberas ti tocat a fai depidu. 

E de sighida, onnia borta chi s'Italia fait calincuna cosa chi ddi fait bessiri prus grai a esportai, dda finit a incorrutzai sa pesa de is pagamentas e a si carriai de depidu cun is aterus stadus (non depidu publicu, depidu privau) intrendi in crisi.

S'arricu e su poberu dae candu su mundu est mundu certant e aici in Italia, ma po ita?
Non po comenti si depant produsiri is arresultaus (a sa fini ambaduus funt incarreraus conca a sa possibilidadi de fai prus arrichesa) ma po sa manera de si partziri su frutu de s'arrichesa produsia. Arratz'e spantu custu puru, berus?
Trabballu e capitali (po dda nai a sa moda comunista) si certant is guadangius.
Su spantu est chi oindii nc'apat genti chi ancora non at cumprendiu ca prus crescit su tanti de genti sene trabballai e prus sa genti pobera chi trabballat nci arrimitit, ca perdit su poderi de cuntratai, ca s'agatant aterus chi po s'abisongiu s'abasciant a trabballai po prus pagu dinari.

Su dinari si incarrerat punta a abi ddoi at prus guadangiu dae fai. E duncas onnia borta chi is cosas si trumbullant (po ita-si-bollat-chi-siat arrexoni) is imprendidoris scuncodrant su chi fiant faendi po inghitzai a fai atera cosa chi cumbenit de prus. Spantosu a beru?
E duncas si non cumbenit a produsiri cosa po bendiri, po nai, ca fait a dda pigai dae is allenus prus a baratu, non tocat a si spantai chi totus si pongiant a fai domus ...

In unu tempus abi non si cumprendit si totus scipiant a beru cali est s'interessu issoru, unu libbru che custu forsis axudat a non perdiri is alientus.

Si ddu boleis comporai
Storia facile dell'economia italiana dal Medioevo a oggi - Amazon