Su mercau de is domus in Sardinnia.

Sa Confcommercio sarda (datus FIMAA) a sa fini de su 2012 at publicau unu raportu chi amostrat comenti siant andendi is cosas in su mercau de is domus in Sardinnia, ponendi a pari su tanti de is domus bendias partendi dae su 2009 fintzas a su 2012.

Su tanti de is domus "a destinazione residenziale" e duncas abi prus che totu ddoi bivint is famillias, cunformas a totus s'ateru (oficius, butegas e aici sighendi) est prus su 45%, duncas giai sa metadi.

A pustis chi s'est tzacada de sa bulluca de su mercau immobiliari (dae su 2007) chi at fatu inghitzai sa crisi, sa Sardinnia puru nd'at cassau sa parti sua de su sciasciu: a sa fini de su 2012 (31/12) su saldu de su tanti is domus bendias at fatu unu 26% in mancu de su 2006.

Su graficu asuta (totu sa Sardinnia) amostrat comenti siant caladas is bendidas.

Sa provintzia de Casteddu po su prus est sunfrendi sa crisi, biu ca s'est torrau meda su tanti de domus bendias de onnia genia ma prus che totu is domus piticas e mesanas comenti amostrat su graficu asuta (cabu de basciu sceti).

Castiendi comenti est cambiau s'IMI (intensidadi de su mercau) giai dae su 2010 a su 2011, si cumprendit comenti sa genti siat stesiendi-si-ndi de is tzidadis po biviri me is biddixeddas in tretu in tretu, ca is domus costant prus a baratu e ddoi at prus possibilidadi de scioberai. Ddu amostrat beni su graficu asuta.

Is cosas prus craras chi ndi bessint dae totus custus datus e chi nc'intrant cun comenti ant a andai is cosas funt duas :

- is famillias sardas comporant sempiri prus pagu domus in Sardinnia;

- is strangius funt sempiri prus interessaus a comporai domus in Sardinnia.

E custu po ita? Nc'at una bella pariga de cosas dae nai :

- is famillias giovunas nci dda faint sempiri prus pagu a si fai imprestai su dinari dae is bancas (po nexi de comenti funt postas is bancas);

- si puru nci dda faint a si ddu fai imprestai su dinari est sempiri prus caru;

- su ai torrau a poniri s'IMU (datziu a suba de sa domu) at fatu cambiai idei a chini si ndi bolit comporai ateras a pustis de sa prima.

Po ndi sciri de prus
Analisi del mercato immobiliare della Sardegna - F.I.M.A.A.