Inflatzioni : a chini tropu e a chini nudda.

Sa nova est de ariseu, su guvernadori de sa Banca de su Giapponi, Haruhiko Kuroda, dd'at nau craru : in duus annus (po su 2014) s'inflatzioni in Giapponi ndi depit pesai a marolla a su 2%.

Giai sa nova a sola fait spantu. In Europa seus sempiri cumbatendi-dda s'inflatzioni ... e is Giapponesus invecias ndi dda bolint fai pesai?

Sa chistioni est ca issus funt in deflatzioni (is pretzius calant) dae 20 annus prus o mancu.

Labai su graficu asuta : sa linia arrubia amostrat in percentuali su chi funt crescius is pretzius annu po annu in Italia (dae su 1998 a su 2012) invecias sa linia birdi amostrat sa propiu cosa po su Giapponi.

Nosu acostumaus a intendiri ca s'inflatzioni fait dannu meda (a marolla, is pretzius crescint e fait a comporai prus pagu cosa) ma fait dannu puru sa deflatzioni, po ita ca sa genti arreguat de prus e spendit prus pagu e duncas ndi calat meda sa licuididadi chi currit.

E custu est su poita is giaponesus bolint fai inflatzioni (re-flatzioni), po moviri s'economia issoru.

Sa cosa de interessu est comenti dd'ant a fai :

- faendi dinari nou (a duas bortas su tanti de yen chi tenit immoi, dae 138.000 miliardus a 270.000 miliardus);

- comporendi billetus de depidu giaponesus e totu (bolint poderai is interessus bascius po fai a manera chi is bancas prestint prus dinari, movias dae sa possibilidadi de fai prus guadangiu aici).

S'atera cosa chi aciungint a custas (e chi fait pensai chi sa retzeta funtzionit a Stiglitz puru) est unu sciacu mannu de investimentus de su stadu po fai cresciri su PBN de su 2% e po fai 600.000 postus de trabballu nous.

Su poderi chi tenit sa sovranidadi monetaria est cosa manna a beru.

Mitzas abi apu piscau
Rivoluzione della Bank of Japan: avanti tutta verso l'inflazione - Sole24Ore
Japan's QE Will Work Better Than US: Stiglitz - CNBC
OCSE - Database