Su shih - S'arti de sa gherra (7)


No est diferenti a guvernai unu esèrcitu mannu e a ndi guvernai unu piticu.
Est chistioni de assetiai e de contai.

No est diferenti a cumbati contras a unu esèrcitu mannu e contras a unu piticu.
Est chistioni de formas e sinnus.

Fait a assetiai is tres armadas a manera chi ferrendi paris cun su nemigu no siat a perdi.
Est chistioni de maneras stravanadas e comunas.

Un'operatzioni militari bincit candu est che una perda scuta contras a unu ou.
Est chistioni de buidu e prenu.

In pagus fueddus, cumbatendi
Fai is cosas comunas po parai su corru a fronti a su nemigu
E fai cosas stravanadas po ddu binci.

Aici,  a chini est capassu de fai cosas stravanadas
No acabat che su celu e sa terra
No spàciat che su Frùmini Grogu e su mari.

Candu acabat, torrat a inghitzai de belle nou,
Aici comenti faint a borta a borta su soli e sa luna.

Morrit e torrat a nasci,
Che is cuàturu tempus.

Is nodas no funt prus de cincu,
Epuru nemus podit nai de ai intèndiu totus is amesturus insoru.

Is coloris no funt prus de cincu,
Epuru nemus podit nai de ai biu totus is amesturus insoru.

Is tastus no funt prus de cincu,
Epuru nemus podit nai de ai tastau totus is amesturus insoru.

Su shih de sa batalla est sceti su stravanau e su comunu,
Epuru nemus podit nai de nci dd'ai fata a spaciai totus is amesturus insoru.

Su stravanau e su comunu si currint pari pari e s'unu ndi strantaxat s'àturu,
Che in unu circu sene inghitzu.
Chini nci dda fait a spaciai is possibilidadis chi ndi nascint amesturendi-ddus?

S'arràbiu de s'àcua, abì nci tirat e amuntonat is perdas: custu est su shih.

Su stori chi si ndi scudit de susu, candu afracat sa cassa: custu est su nuu curtzu de sa canna.

Duncas, su chi est àbili cumbatendi
Tenit unu shih chi no fait a ddu poderai,
E unu nuu curtzu.

Su burdellu ndi nascit de s'òrdini.
Sa timoria ndi nascit de su coràgiu.
Sa debilesa ndi nascit de sa fortza.

Su chi sighit su shih guvernat is sordaus cumbatendi comenti e chi fessant truncus de mata e arrocas arrumbulendi.
Candu funt in pranu, funt firmus.
Candu ddus sumbullas, si movint.
Candu funt cuadraus abarrant firmus.
Candu funt tundus, si movint.
Aici, su shih de sa ghia àbili, chi est portendi-nci unu esèrcitu a cumbati, est comenti e chi siat a fai arrumbulai arrocas tundas de unu monti artu milla jen.

Custu est su shih.


No serbint a marolla is lìburus de economia po cumprendi s'economia.
A bortas bastat a ligi su chi scriiat prus de duamilla annus a oi sa genti a s'àteru càbudu de su mundu, po si nd'acatai de comenti is cosas andànt, andant e forsis ant a andai sèmpiri.


Sa primu parti dd'agatais innoi.
Sa segunda parti dd'agatais innoi

Sa de tres partis dd'agatais innoi.
Sa de cuàturu partis dd'agatais innoi.
Sa de cincu partis dd'agatais innoi
Sa de ses partis dd'agatais innoi.
Su shih - S'arti de sa gherra (7) Su shih - S'arti de sa gherra (7) Reviewed by Andrea Maccis on 14:24 Rating: 5

Nessun commento:

Powered by Blogger.