Is sardus pensant sèmpiri chi totu sa cosa noba chi biint, calincunu ndi dd'apat bitida de continenti e nimancu a lestru meda, a pustis de unu bellu tempixeddu, "su tempus de sartai su mari" si narat.
E puru, chentze nimancu andai a si impruinai meda scorrovonendi me in su tempus antigu (e labai ca cosa si ndi iat a podi narai meda), sa Sardìnnia at bìviu una bella pariga (a sa sarda) de annus abì is cosas sartànt su mari giai, ma po andai de innoi a continenti, no a s'imbressi. Annus chi is sardus ant bìviu comenti e chi fessant sbeliaus e duncas parit chi no ndi ddis siat abarrau arregordu.
Fiant is annus de Internet, o mellus fiant is annus chi Internet inghitzàt a si incarai a su mundu.
In su mesi de austu de su 1993 (08/1993) su CRS4 (Centro di ricerca, sviluppo e studi superiori in Sardegna - Centru de circa, svilupu e stùdius superioris me in Sardìnnia) ponit in s'arretza su primu situ web in Italia (e su segundu in Europa): crs4.it. Nemus forsis ancora cumprendiat beni su poderi chi iat a ai tentu su www de innoxi a una pariga de annus, ca pariat chi fessat una cosa cun sa preneta de abarrai chistioni po unu nìciu.
Su 31 de su mesi de argiolas (31/07/1994) s'Unioni Sarda est su primu giornali in Europa a aproliai a s'arretza gràtzias a s'imprendidori Nicola Grauso e a su CRS4, mancu narau si bolit. Unu giornaleddu regionali, crètiu mai ddu ias a ai?
Su 3 de su mesi de idas de su 1994 (03/12/1994) Grauso aberrit me in Casteddu Video On Line, su primu internet provider (s'atividadi chi bendit sa connetividadi a sa genti) me in Italia.
Su 10 de su mesi de martzu de su 1995 (10/03/1995) Luca Manunza (circadori de su CRS4 in su tempus) fait sciri a su mundu, comenti bieis asuta (newsgroup comp.infosystems.www.announce) ca at scritu sa primu webmail. Sa primu de su mundu, cumprèndiu? Dda eis mai lìgiu una email sceti cun su browser? Certus ca ei, cun Tiscali, cun Gmail, cun su chi boleis: aberreis su browser, imbucais e ligeis. Ita si parit su sciri ca custa cosa est nàscia in Sardìnnia?
In su mesi de friàrgiu de su 1999 (02/1999) Tiscali inghitzat a donai sa connetividadi chentze abonamentu, obrighendi a totus is àterus providers italianus a fai su pròpriu.
E oi? A pustis de una filera de annus a primu puba, oi nosi tocat torra a ponni infatu a is àterus chi funt prus lestrus currendi e chi, po narai sa beridadi, parit puru chi ndi tèngiant prus gana de curri. Ma s'arretza iat a podi donai meda a sa Sardìnnia e custa borta forsis iat a fai a incungiai calincuna cosa puru, prus che s'àtera borta.
Mancai iat a fai a torrai a inghitzai abì nosi seus firmaus in su mentris chi is àterus ghetànt passus. Cun su domìniu cosa nosta, po ndi narai una: su puntuSRD. Is firmas seus ancora boddendi-ddas, ma su traballu chi abarrat de fai est totu po bosàterus, est a firmai: .srd #puntuSRD : un dominio per la Sardegna - unu domìniu po sa Sardìnnia - a domain for Sardinia
Po ndi sciri de prus:
L'innovazione, 20 anni fa [quando non c’erano le startup]. Luca Manunza: un pioniere del web. - FocuSardegna
Pietro Zanarini e il primo sito web italiano: "Testi e link, quanta novità in quella pagina" - Repubblica.it
1994-1996: un biennio cruciale nella storia di Internet e del giornalismo on-line - Storia e Futuro
In Rete senza abbonamento Si paga solo la telefonata - Repubblica.it
