Tontesas, mexinas de s'ogu liau e sceberus giustus po ndi bessiri dae sa crisi.

In sa filera de is libbrus chi fueddant de sa crisi de oindii, non est mali a ligiri Tontesas, mexinas de s'ogu liau e sceberus giustus po ndi bessiri dae sa crisi (Eresie, esorcismi e scelte giuste per uscire dalla crisi, Paolo Savona - Rubettino, 2012) chi giai giai si podit nai chi fatzat un'alloba cun Su scurigadroxu de s'euro e non po sa mannesa (custu est unu libbrixeddu de 100 paginas) ni po su chi narat (po calincuna cosa andant a manu pigada, po medas ateras no), ma po ita ca mentris cudd'ateru libbru dd'at scritu unu economista de universidadi (Alberto Bagnai) chi est allenu prus o mancu a totu su chi sutzedit in su palatzu nareus, custu libbru invecias dd'at scritu unu economista de stadu, Paolo Savona, chi in su palatzu est de domu (at fatu fintzas su ministru) e duncas su spantu (ma spantu non iat a depiri essiri) chi ndi benit ligendi-ddu, est ca amostrat comenti, castiendi dae aintru o dae foras, is sballius mannus fatus parrint prus o mancu is propius.

Inghitzat chistionendi de s'arti chi dae sempiri ant tentu is italianus po non arresolviri is cosas o po ddas ingraiai circhendi de ddas arresolviri (non est de badas chi su libbru arremonat tontesas e mexinas de s'ogu liau) contendi de totus is bortas chi issu ddoi fiat in mesu (circhendi de donai consillus e giai sempiri arrenneghendi-si ca non ddu ascurtaant), carcat sa pinna scriendi de comenti is italianus nci dda fatzant sempiri a ponniri in proi mali fintzas is cosas bellas e arribbat a chistionai de is promissas chi dintedii si sighint a intendiri dae is politicus, cussas promissas de cosas chi iant a depiri aconciai is sconcius, ma chi funt sempiri is propias dae unus cantus annus e chi o non ant arresolviu nudda o non at fatu a ddas fai fintzas a oi.

A sa fini de su libbru torrat a donai cussus chi po issu funt is consillus giustus po ndi strantaxai su stadu (chi fintzas a immoi est incorrotzau ma luegu e totu sighendi su mori nci dda podit fai a dd'acabbai sterriu) ma sa chistioni chi importat de prus, forsis, e chi parrit poderit a sola su libbru est una : tocat a fai s'interessu de su stadu o a una manera o a s'atera.
Savona ddu narat craru, non tocat a timiri, ca de su chi timis non ti ndi salvas. Non est po sempiri s'euro, non est po sempiri sa UE e serbit chi s'Italia fatzat po una borta s'interessu suu, sene abetai una manu de axudu dae is strangius (chi a nai sa beridadi parrit chi non ndi tengiant nisciuna gana de dda axudai) e sene nimancu abetai chi is strangiu e totu siant de acordiu a su chi scioberat de fai.

Po issu serbit unu piano A (ca ddi praxit a pensai ca fatzat a aconciai is sconcius abarrendi in sa UE e in s'euro) ma fintzas unu piano B (una manera po ndi bessiri) non fessat po ateru chi po ndi fai atzicai a is chi faint sa boxi grussa, cun su pensamentu ca s'Italia si ndi potzat scanciai sene abarrai promitendi-ddu meda meda, candu si nd'acatat ca sa cosa non ddi cumbenit prus. 

E a cantu scriit issu, a dolu mannu, po immoi, non fait a apubai ni su piano B e forsis peus puru, nimancu su piano A.

Si ddu boleis comporai
Eresie, esorcismi e scelte giuste per uscire dalla crisi. Il caso Italia - Amazon

Librus chi tocat a ligiri : Su scurigadroxu de s'euro.

Nc'at sceti duas arratzas de librus : cussus chi fait a ddus cundrexiri e cussus chi non fait a ddus cundrexiri, ca candu ti orvidas, nci dda faint a ti cumandai cussus a tui. 

Parrit strambu a ddu nai, ma a chini ligit, seguru ca dd'est incapitau de si perdiri a intru de unu libru sene nci dda fai prus a sighiri su mori, scutulau a una parti e a s'atera dae is fueddus, ca su chi contaant fiat aici bellu, aici tristu o aici fungudu de nci dda fai a trumbullai sa conca e a allui unu biaxi de pensus e pensamentus.

Su scurigadroxu de s'euro (Il tramonto dell'euro, Alberto Bagnai - Imprimatur, 2012) est unu de cuddus librus chi non fait a ddus cundrexiri, mancari non siat unu contu, ma sceti unu libru chi chistionat de economia, o forsis prus che totu de politica.

Torrat a cou contendi 30 annus (e prus) de politica italiana (ma puru europea e de su mundu), sciacuendi-ndi su brutori dae su chi scieus (non po nexi nostra ma ca nosi dd'ant imparau aici) cun sa lissia de is numerus, amostrendi comenti sa politica apat manixau is odriangus de sa lei po lassai s'economia sene nisciuna cadena, fintzas a dda fai arribbai a is arresultaus de oindii.

Ddu iaus giai nau ca su mali prus mannu de sa crisi est comenti nosi dd'ant contada ma su chi si ligit in Su scurigadroxu de s'euro a beru nosi fait pensai ca est cosa meda chi nos'ant contau in mala manera in totus custus annus.

Inghitzendi dae su murighingiu chi fiat pigau a is stadus po ndi tirai is arregulas chi faiant a castiadori a su dinari chi si movit dae unu logu a s'ateru, passendi a traessu in sa chi tzerriaus indipendentzia de is bancas tzentralis (e chi ateru non est stetia che unu corpu de stadu durci, chi nci dd'at fata a ndi strantaxai unu poderi soberanu nou acanta a is aterus tres, su poderi monetariu) e arribbendi a s'acordiu po portai su propiu dinari in medas stadus de s'Europa, su libru amostrat comenti sa genti chi trabballat nci dd'apat fata a perdiri giai totus is deretus (e siat sighendi a nci ddus perdiri) chi iat coberau in annus e annus scavuendi sudori e fintzas sanguini.

Ndi sciorrocat a unas a unas is faulas strantaxadas a pitzus de s'inflatzioni, de sa svalutatzioni, de sa produtividadi e de su depidu publicu, torrendi is onoris (candu fait) a is italianus trabballantis e puru a sa politica candu est fata po s'interessu de is eletoris (candu su tanti de is pagas fiat prus artu cunformas a su PBN, su PCI teniat prus votus), amostrat candu est chi is stadus podint portai su propiu dinari sene fai dannu a sa genti chi ddoi bivit, alluit sa luxi a pitzus de su depidu chi ingollit is stadus a beru (su depidu fatu cun is aterus stadus) e serrat amostrendi ca is acordius po portai su propiu dinari, comenti si faint aici si sciusciant, si sa politica est incarrerada conca a s'idei de fai biviri beni e in paxi sa genti.

In mesu a totu custu non amancat nimancu sa possibilidadi de si nci fai scapai s'arrisu candu s'autori contat is bisus suus (sempiri in su mercau de su pisci, cuntratendi cun is pisciaius) chi, frassus o berus chi siant, faint cumprendiri comenti iat a depiri funtzionai s'economia si fessat beru totu su chi nosi narant dintedii in televisioni o me is giornalis.

Ma nc'at una cosa dae nai : comenti fait profetu (ca axudat a cumprendiri su chi est sutzedendi oindii e a non si ndi spantai po su chi at a sutzediri), aici Su scurigadroxu de s'euro fait dannu. 

Est che una cracida de acua frida ghetada a faci a chitzi, chi ti ndi scidat e a lestru puru, ma totu in una chi ses scidu, inghitzas a ti nd'acatai de comenti nci dd'apant fata a ti collionai in totus custus annus e comenti tui ddus apas axudaus puru.

Est che sa pindula arrubia de Matrix, immoi est a bosaterus a scioberai.

Si ddu boleis comporai
Il tramonto dell'Euro - Amazon